O soño fíxose realidade o 19 de maio de 2000. Tras o subcampeonato de 1950 e quedar a 11 metros do título en 1994, chegaba a hora de celebrar o título de Liga na Coruña. A Liga máis igualada da historia, como testemuñan os 69 puntos e 11 derrotas que subiron ao taboleiro do Dépor e os 27 puntos de distancia entre o campión e o primeiro descendido, tivo un epílogo indeleble, nun Riazor ateigado, con goles de Donato e Makaay. Mais para chegar a iso houbo moito que vogar con anterioridade. Na 10ª xornada despegou definitivamente o conxunto herculino, que sumou 7 vitorias consecutivas. En metade desa serie, após gañar 5-2 ao Sevilla na 12ª xornada, ergueuse a un liderado que xa non volvería soltar. Pese ao 0-3 ante o Racing en Riazor, ao gol inxustamente anulado a Songo'o en Soria, á autoexpulsión de Djalminha ante o Zaragoza ou á derrota en Balaídos ante un Celta con dez. No regreso a Europa tras un ano de ausencia, o Arsenal foi o verdugo nos oitavos de final da Copa da Uefa.