Arsenio regresaba á dirección do equipo dez temporadas despois da súa marcha ao Hércules, cunha intención: devolver a Primeira un equipo que xa levaba dez anos sen pisar a división de honra. Estadio novo, a madurez de varios alicerces, o regreso do fillo pródigo... Unha aposta gañadora que comezou a verse cada dous domingos en Riazor, onde o Dépor gañou os seus primeiros 11 partidos. O primeiro pau en casa chegou na 23ª xornada, ante o Palencia (0-2), nun partido no que o Dépor viu tres cartóns vermellos. Antes, tras derrotar ao Sabadell (3-1) na 17ª xornada, os branquiazuis instaláronse na zona de ascenso. Un empate en Linares, na penúltima xornada, daba ao Deportivo a posibilidade de ascender se non perdía no último encontro ante un Rayo que non se xogaba nada. A derrota por 1-2 converteu un abarrotado Riazor nun funeral. Con 16 goles, José Luis foi o primeiro centrocampista que gañaba un Trofeo Pichichi en Primeira ou Segunda. Ao finalizar o campionato, o Dépor debutou na Copa da Liga de Segunda, na que alcanzou a final, que perdeu ante o Atlético Madrileño.

Liga (Segunda División) 4º con 46 puntos (19 v, 8 e, 11 d, 58 gf, 36 gc)
Copa do Rei Oitavos de final (elimina a Lugo, Gran Peña, Palencia e Alcoyano, eliminado polo Athletic de Bilbao)
Copa da Liga de Segunda División Finalista (elimina a Palencia, Oviedo e Xerez, eliminado polo Atlético Madrileño)