Nos seus máis de cen anos de vida, o RC Deportivo viu pasar polas súas filas a máis dun milleiro de futbolistas. Con todo, só uns poucos alcanzaron a excelencia a través da súa fidelidade ás cores. Son as lendas do deportivismo, aqueles que dedicaron toda ou a maior parte da súa carreira deportiva ao noso Club.

É hábito en Inglaterra, o berce do fútbol, a celebración dos 'testimonial match', en honra aos xogadores que militan dez temporadas nun mesmo Club. Unha maneira especial de premiar o seu esforzo e a súa lealdade. É por iso que o Club quixo recoñecer a todos aqueles deportivistas que cumpren ese requisito, ademais de aos máximos goleadores da súa Historia, os que marcaron máis de 100 tantos en partidos oficiais.

Tamén nesa mesma liña son recoñecidos os vencedores do trofeo "Pichichi", tanto en Primeira como en Segunda División, así como do trofeo "Zamora", igualmente en ambas as categorías, e os futbolistas coruñeses que vestiron algún día de branquiazul e chegaron a ser internacionais absolutos con España.