Ryan Babel, autor do primeiro tanto onte en Riazor ante o Sevilla, compareceu esta mañá ante os medios informativos na sala de prensa de Abegondo.
O dianteiro deportivista apunta sobre a actuación do colexiado valenciano Mateu Lahoz que "non teño nada que comentar dos árbitros". "Levo tempo xogando ao fútbol. Nunca estiven nunha situación na que opinar sobre o árbitro cambiara a decisión arbitral. Entón non vale a pena comentar", engade.
Sobre o choque ante os andaluces recoñece que "foi unha desilusión moi grande perder onte, deixando escapar un 2-0. Pero quitando o resultado, sentinme positivo co equipo. Esto é fútbol, temos que mirar para adiante e seguir traballando".
Apunta Babel que "isto ocorre. As veces un equipo merece máis e recibe menos. Entón o equipo ten que ter unha mentalidade forte, estar unido e traballar moito".
A nivel persoal, o dianteiro holandés, no seu segundo encontro como titular esta temporada, opina que "se teño que estar no banquillo estou no banquillo e se teño que xogar, estou listo".
Sobre a súa renovación, recalca que "nestes momentos non hai nada que falar. Temos que agardar".