O Racing de Ferrol puido habilitar o fondo do Estadio da Malata para o partido Racing de Ferrol-Dépor (domingo 16 de abril, 19:00 h.), polo que o número de localidades dispoñibles para a afección Deportivista pasa das 866 inicialmente anunciadas a 1.866. Destas, 746 serán xestionadas directamente pola Federación de Peñas en virtude do acordo existente entre ambas as entidades.
Das 1.866, 866 terán un prezo de 20€ (en reciprocidade ao número e prezo das entradas do partido de ida en ABANCA-RIAZOR) e o resto, 1.000, despacharanse a 25€, sendo a totalidade de entradas da mesma bancada.
Todas as persoas socias do RC Deportivo que o desexen poderán mostrar a súa vontade de acudir ao partido pre-reservando a súa entrada para o choque en entradas.rcdeportivo.es.
Como en anteriores partidos de alta demanda, está en funcionamento o sistema de pre-reserva de entradas seguindo estes criterios:
- Desde o luns 3 ás 10:00 h. está activa a plataforma entradas.rcdeportivo.es, operativa até hoxe martes 4 ás 23:59 horas.
- Só poderán pre-reservar entradas persoas socias do RC Deportivo. O sistema permitirá facer a pre-reserva de 1 ou 2 localidades para o partido. A persoa socia deberá introducir o seu nome, apelidos, número de Abonado/a e ID de socio/a. Ao facer click en "Pre-reservar" recibirá un correo que deberá validar obrigatoriamente para completar o proceso (advertencia: nalgúns casos este correo chega á caixa de correos de spam, polo que se recomenda comprobar a súa recepción, xa que a validación é obrigatoria para completar a pre-reserva).
- Lémbrase a persoas socias do RC Deportivo que a adxudicación é nominativa, por tanto a persoa socia que introduza a súa ID, nome e apelidos e sexa seleccionada na pre-reserva, xa sexa seleccionando 1 entrada ou se selecciona 2, terá que facer uso directo da súa entrada, non podendo cedela a un terceiro.
- A todas aquelas persoas socias que non teñan acceso a internet ofréceselles a posibilidade de facer persoalmente a pre-reserva na Oficina de Atención ao Deportivismo do Estadio ABANCA-RIAZOR. As persoas empregadas do RC Deportivo serán as encargadas de introducir os seus datos no sistema para que este xere o número de pre-reserva correspondente. Esta opción estará dispoñible luns e martes de 10:00 a 13:30 e de 16:30 a 19:00 horas.
- Unha vez pechado o prazo para este proceso, dado que o número de pre-reservas realizadas por persoas socias do Deportivo xa é, no momento desta publicación, superior ás 1.886 entradas dispoñibles, todas as pre-reservas validadas ordenaranse automaticamente por antigüidade de socio/a.
- Cada persoa adxudicataria recibirá un correo electrónico indicándolle que pode proceder a retirar a súa/s entrada/s o sábado 8 de abril nos despachos de billetes do Palacio dos Deportes sinalizadas ao efecto como "entradas Racing de Ferrol - RC Deportivo" de 10:30 a 13:30 e de 16:00 a 20:00 h.; ou o luns 10 e martes 11 na Oficina de Atención ao Deportivismo en horario de 10:00 a 13:30 e de 16:30 a 19:00, sendo imprescindible mostrar o DNI físico ou fotocopia das persoas destinatarias finais das entradas, sendo un deles o da persoa socia que realizou a solicitude.
- A venda de entradas realizarase por orde de retirada, é dicir, despacharanse primeiro as entradas de 20 euros e, unha vez esgotadas, continuaranse vendendo as de 25 euros, nun proceso xa aplicado deste xeito polo Club en situacións precedentes con dous prezos distintos de localidades.
- Pasado este prazo inicial de tres días de recollida, as entradas sobrantes daquelas persoas adxudicatarias que non as retirasen poranse a disposición de todas persoas socias do Club o mércores 12 de abril en venda libre e directa no horario antes sinalado de apertura da OAD. Chegado este caso, extremo que se confirmará pública e pertinentemente a través de todas as plataformas de comunicación do Club, tamén é imprescindible a presentación do DNI de cada destinatario final das entradas, podendo retirarse un máximo de dúas entradas por persoa socia, sendo imprescindible que una delas pertenza á persoa titular do abono, e podendo presentar cada unha un único carné en portelo.
