Irene Ferreras, adestradora do Deportivo ABANCA, aproveita calquera semana de parón na Primeira Federación Iberdrola para sacar ás súas xogadoras da Cidade Deportiva, cambiar a rutina e desconectar da tensión dunha competición igualada desde a primeira xornada, con varios aspirantes ao ascenso directo e outros tantos aos postos de play off de ascenso.
En anteriores semanas sen liga houbo actividade en Karting Marineda nunha ocasión; almorzo en San Brandán Lunch de Fnac e posterior xogo en The Rombo Code da Grela noutra; e hoxe, aproveitando a chegada da primavera, as agradables temperaturas e o sol, As Nosas divertíronse a escasos quilómetros da Cidade Deportiva, na praia de Sabón (Arteixo), xogando ao voley e ao fútbol na area por xentileza de Amarelle Academy, que cedeu o seu material deportivo.
Outra xornada que serviu para recargar baterías antes do tramo decisivo que concluíu ademais cun refresco para xogadoras, persoal técnico e auxiliar.
Mañá xoves, o Dépor ABANCA porá o punto e final á semana cun último adestramento ás 10:00 en Abegondo.
A próxima cita para o cadro deportivista en liga é o domingo 16 de abril ás 12:00 pola Cidade Deportiva Andrés Iniesta coa visita ao CD Alba Fundación, en partido correspondente á 26ª xornada.
