O Dépor visitaba a un descendido Pontevedra co único obxectivo clasificatorio de ascender un posto, até o terceiro, para ter o facto campo a favor en semifinais do playoff. Todo iso se o Real Madrid deixábase puntos en Linares. En fronte, un rival que quería despedir da mellor maneira posible a un histórico como Charles após o descenso matemático hai varias xornadas.
Con eses ingredientes, Rubén de la Barrera optou por moitas rotacións no once por diversos motivos, desde evitar sancións no playoff até protexer a futbolistas que non estaban ao 100% fisicamente, pasando por dar minutos a xogadores con menos rodaxe a estas alturas da campaña.
A primeira parte foi o contrario ao vivido hai unha semana en ABANCA-RIAZOR en canto a ritmo, intensidade e ocasións.
Após o primeiro saque de esquina dos granates o Dépor saíu rápido á contra pola esquerda para cambiar de banda no tramo final da xogada cun disparo alto de Yeremay. A resposta, en espello, unha condución de Álex González para Brais Abelenda que non chegou ao remate.
Tívoa clara, nun centro tamén desde a esquerda, Charles de cabeza, rematando alto na frontal da área pequena. Ambos os equipos tocaban con parsimonia, saíndo desde atrás e buscando as xogadas elaboradas, como a que protagonizaron Pepe, Rubén e Lucas, antes de prolongar a Yeremay e que Derik Osede, ao corte, evitase que o balón alcanzase portería.
Índose ao centro coa zurda, Álex González disparou de lonxe para a parada en dous tempos de Ian Mackay.
A máis clara do primeiro tramo tívoa Mella. No seu debut como titular deixouse ver recibindo na frontal e disparando raso para facer tremer a cepa do pau esquerdo da portería de Pablo Cacharrón.
Sen moita máis historia, ambos os equipos encararon o túnel de vestiarios igual que o deixaron corenta e cinco minutos antes.
A segunda parte seguiu polos mesmos camiños no reinicio. A primeira aproximación chegou a balón parado nunha falta lanzada por Lucas que peiteou Derik para evitar o remate e mandar a corner.
Un erro no despexe deixou o balón franco para Brais Abelenda que non o dubidou á hora de empalar e anotar polo recanto da portería de Mackay.
Co Pontevedra por diante no marcador Rubén de la Barrera axitou o partido cos cambios que fixeron efecto desde o arranque con Álex ao mando do equipo. O capitán deixoulla a Quiles, que entrou moi enchufado, e este a Jaime que atopou a Yeremay, ao que se anticipou a defensa. De novo Álex tentouno, nesta ocasión cara a Lucas nun gran pase entre liñas ao que o dianteiro non chegou por pouco.
Quiles estrelou á hora de partido un balón no pau após recibir de Jaime. O rexeite caeu de novo ao pé pero o remate fóiselle alto, igual que a volea uns minutos despois a centro de Lucas.
O dianteiro coruñés cedeu un balón para Yeremay que recortou varias veces dentro da área antes de disparar e atoparse a man de Pablo Cacharrón. Os últimos minutos o Dépor non deixou saír de atrás ao Pontevedra até lograr o empate.
Chegou na prolongación nun remate de Lucas que Churre sacou coa man dentro da área. Quiles executou o penalti para anotar un gol que merecía desde minutos antes. Poucos despois a perna falloulle, desatando todas as alarmas en Pasarón, pola gravidade que poida ter a lesión do dianteiro onubense nun partido que non servía xa para o único obxectivo previo que era alcanzar a terceira praza.
Cuartos finalmente, por detrás de Racing, Alcorcón e Castilla, os Deportivistas xa saben que Castellón en ABANCA-RIAZOR a próxima fin de semana e dentro de dúas semanas en Castalia, son os capítulos a escribir na semifinal do playoff de ascenso a LaLiga Smartbank.
Pontevedra CF: Pablo Cacharrón, Seoane (Jaichenko, min. 72), Derik, Churre, Samu Araujo, Brais Abelenda (Javi Robles, min. 89), Borja Domínguez (Rufo, min. 89), Miguel Román, Álex González, Yelko Pino (Ángel Bastos, min. 61) e Charles (Álex Masogo, min. 72).
RC Deportivo: Mackay, Trilli, Jaime, Pepe Sánchez, Raúl Carnero (Lebedenko, min. 55), Rubén Díez (Svensson, min. 75), Olabe (Álex Bergantiños, min. 5), Isi Gómez (Villares, min. 70), Mella (Quiles, min. 55), Yeremay Hernández e Lucas.
Goles: 0-1 Brais Abelenda (min. 48); 1-1 Quiles -p- (min. 90+1).
Árbitro: Ruiz Álvarez (c. asturiano). Amoestou a Miguel Román (min. 41), Olabe (min. 52), Churre (min. 74 e 89) e Yeremay (min. 90+8).
Incidencias: partido da 38ª xornada, última da fase regular, de Primeira Federación disputado no Estadio Municipal de Pasarón. Antes do partido, Pontevedra CF e RC Deportivo homenaxearon a Charles Dias no seu último encontro como futbolista profesional.
