José Luís Gómez ve ao Dépor como 'un existoso símbolo de resistencia fronte ao abuso'

"Lei de Caixas, Decreto do Galego e cambio no PP de Ourense. Son ou eran o tres grandes obxectivos políticos do Presidente da Xunta, Alberto Núñez Feijóo, acirrado polo diario 'La Voz de Galicia', cada vez máis entregado a certos intereses do PP, cuxo goberno, cos impostos de todos, faille suculentos xiros de diñeiro practicamente cada semana. Nalgunha ocasión, segundo recoñecen ambas as partes publicamente, a cambio de 'informar' da xestión da Xunta; algo sen precedentes nas democracias occidentais onde exista prensa libre e independente. Ambas as partes tambien seguen empeñadas en botar abaixo o decreto eólico, aínda que neste caso tropezan coa acción da xustiza, e fan todo o posible por cargarse a Augusto César Lendoiro e ao Deportivo, que no fondo é unha maneira de matar a ilusión de moita xente e, en especial, de moitos rapaces. Neste asunto, a Xunta fixo tanto o ridículo que anuncia o Xacobeo 2010 nos partidos televisados do Dépor pero, para danar ao único club galego de Primeira División, faino de maneira que este non reciba nin un euro. E como queira que Feijóo se declara deportivista, suponse que con semellante insensatez só tenta compracer a Santiago Rey, o editor de 'La Voz de Galicia' empeñado en levar por diante a Lendoiro,quen resiste como gato bandullo arriba, pero resiste. Faino como llanero solitario, sen que apenas ninguén lle bote unha man nunha cidade como A Coruña, cuxos grandes homes parecen ter medo. Pero non pasa nada: a pesar de todo, do único que fala cada día a CNN con respecto a Galicia é do Deportivo, convertido nun exitoso símbolo de resistencia fronte ao abuso".