José Luís Oltra e o seu corpo técnico, presentados na Praia Club

Oltra empezou a súa carreira como técnico no Catarroja no ano 2001. Dirixiu a continuación ao Castelló de Segunda División B dúas tempadas nas que estivo a piques de ascender a Segunda A. Posteriormente marchouse ao filial do Levante, tamén en Segunda B e, esa mesma tempada relevou a Schuster no banco granota do primeiro equipo, a falta de catro xornadas para o final da liga en Primeira División. O equipo descendeu pero José Luís comezou a campaña seguinte no Ciudat de Valencia (2005-06), sendo destituído na xornada dez co equipo na metade da táboa. Logo adestrou á Cidade de Murcia (2006-07), tamén en Segunda División; ao Tenerife, co que logrou o ascenso a Primeira; e finalmente esta pasada tempada ao Almería durante uns partidos, relevando a Lillo e sendo cesado e substituído por Roberto Olabe.
 
Agradeceu en primeiro lugar o presidente deportivista a colaboración do Grupo Baía e do propio José Luís Oltra para pechar nun breve espazo de tempo as negociacións. "A ilusión que temos depositámola nunha persoa nova", di Lendoiro, elixido "o seu concepto de ver o fútbol, a súa maneira de ver as cousas que encaixa moi ben na liña que os deportivistas, coruñeses e galegos temos sobre o fútbol".
 
"Dámoslle a benvida e desexámoslle moita sorte que será tamén a sorte do Deportivo", engadiu o presidente branquiazul, acompañado polos conselleiros Francisco Dopico e Jesús Rebollo. "Nestes 'veintimuchos' anos que levamos foron moi poucos os adestradores que temos. Todo se basea na confianza entre todos. E éso non se consegue da noite para a mañá", finalizou.
 
A continuación tomou a palabra José Luís Oltra. "Veño a un club máis que centenario, un club que na última década gañou unha Liga, dúas Copas, unha semifinal da Recopa, outra da Champions, e que por circunstancias caeu á segunda División. Con esta afección que nos sorprendeu a todos na última xornada, hai que coller a onda boa e regresar á elite que é o obxectivo".
 
Iso si, Oltra advirte que haberá dificultades porque "a categoría é longa e dura. Teremos tamén os nosos momentos malos". Por fin, recoñeceu que aínda non falara con ningún xogador pero farao nos próximos días, do mesmo xeito que con Miguel Anxo Lotina, "co que manteño unha boa relación".