Os Nosos regresaron aos adestramentos esta mañá na Cidade Deportiva. A pesar do indiscutible triunfo de onte en ABANCA-RIAZOR ante o Algeciras CF, do ambiente, de #ANOSAFORZA... Rubén de la Barrera en rolda de prensa subliñou que "hai moitas cousas a revisar e a axustar, lóxicas polo tempo".
Iso si, os titulares onte en ABANCA-RIAZOR non pasaron esta mañá de tarefas de recuperación: carreira continua, rondos, estiramentos e fisioterapia.
Para o resto do cadro, incluído o canteirán David Mella, a xornada foi de alta intensidade, cun quecemento; un exercicio de centros laterais con finalizacións; unha tarefa física con remates e duelos; e fútbol reducido para concluír.
Mañá luns haberá xornada de descanso para o cadro. O Dépor adestrarase de novo o martes ás 10:30 en Abegondo, con almorzo previsto a partir das 9:00 horas.
O Dépor concluirá a liga no grupo 1º de Primera Federación o vindeiro sábado 27 de maio ás 19:30 en Pasarón ante o Pontevedra CF.
Precisamente sobre este partido, e aínda que o equipo xógase subir un chanzo máis na táboa, ao terceiro posto, co que iso leva nos playoff de factor campo ou de vitoria en caso de empate ao final da prórroga, Rubén de la Barrera recoñeceu onte que "teremos especial coidado" cos xogadores que agora mesmo teñen 4 cartóns e, por conseguinte, están a un de ter que cumprir un partido de sanción, que sería no primeiro do playoff.
