O clásico Trofeo Mini Teresa Herrera, este sábado 5 de agosto ás 10:30 en ABANCA-RIAZOR, servirá de preámbulo a unha emocionante tarde co decano dos torneos estivais.
O Deportivo e o Ural Español CF xogarán a final de categoría benjamín, na metade de campo máis próxima á bancada de Pavillón.
Mentres que en prebenxamíns, Ural Español CF e Compañía de María pelexarán pola 'Torre' na metade de campo máis próxima á bancada de Marathón.
Para o público, que ten entrada gratuíta, o Club habilitará a bancada de Tribuna Inferior.
Pola tarde, ás 17:00, Deportivo ABANCA e Deportivo Alavés Gloriosas protagonizarán a XI edición do Trofeo Teresa Herrera Feminino no debut desta pretemporada das Nosas.
Ás 19:30, Álex Bergantiños, un dos grandes capitáns na historia do Dépor, disputará co motivo da LXXVIII do Trofeo Teresa Herrera ante o Red Bull Bragantino, os seus últimos minutos vestido coa camiseta branquiazul. Desta forma, o mediocentro coruñés, agora membro do Consello de Administración do RC Deportivo, recibirá o agarimo e o recoñecemento de #ANOSAFORZA na súa retirada do fútbol despois de 336 partidos oficiais, que o converten no noveno xogador que máis veces vestiu a camiseta branquiazul ao longo da historia.
O decano dos torneos estivais arrincará co recordo de Luis Suárez, outro coruñés e deportivista universal, recentemente falecido, polo que se gardará un minuto de silencio.
Como broche de ouro dunha emocionante tarde en ABANCA-RIAZOR, Bebeto e Mauro Silva, dúas lendas deportivistas, poderán comprobar o enorme agarimo que #ANOSAFORZA lles profesa despois de tantas tardes de gloria por España e Europa defendendo a camiseta branquiazul; sendo ademais os dous únicos futbolistas na historia do Dépor que foron campións do mundo mentres xogaban na Coruña.
