Presentado o XVIII Torneo Vitoria ''Memorial Moncho Rivera'' do próximo venres

Fernández asegurou, na rolda de prensa de presentación do partido entre o SuperDépor e o EuroCelta celebrada na cervecería de Estrela Galicia en Catro Camiños, que “para o Deportivo é unha honra participar un ano máis neste torneo”. O presidente do RC Deportivo engadiu que é “unha satisfacción por poder facer algo disto unha versión máis da gran festa do fútbol galego”.

 

“Os afeccionados do Deportivo poderemos ver en acción outra vez a unha chea de lendas que nos van a traer moitísimos recordos”, destacou o mandatario branquiazul, que desvelou que á convocatoria deportivista anunciada en días anteriores sumáronse Carlos Marchena, Dani Aranzubía e Turu Flores.

 

Juan Carlos Vázquez, presidente da Vitoria CF, lembrou a figura de Moncho Rivera e como o seu club retomou a organización dun torneo que deixara celebrarse durante moitos anos. O rexedor do club de Santa Lucía quixo mostrar o seu agradecemento ao RC Deportivo pola súa cesión do Estadio de Riazor “porque todo son facilidades”, a Corporación Fillos de Rivera, ao Celta e ás Federacións de Penas e ás asociacións de Veteranos de ambos os clubs.

 

Pedro Pousada, vicepresidente do Celta, desculpou a ausencia do presidente do club olívico e tamén considerou que para a súa entidade “é unha honra” ser convidada o torneo, ademais de destacar que o patrocinador do torneo, Estrela Galicia, é tamén o de ambos os equipos, un caso único nun campionato do nivel de LaLiga Santander.

 

O dirixente vigués tamén apelou á irmandade entre as afeccións de ambos os equipos, a través de eventos como o do próximo venres. “Oxalá tivesen a mesma relación que temos os consellos de administración”, argumentou.

 

Alberto Martí Villardefrancos, presidente da Cociña Económica, destacou que actualmente a súa organización solidaria atende diariamente a 1.600 persoas, expresou o seu agradecemento a Estrela Galicia pola súa estreita colaboración.

 

Por último, Ignacio Rivera, conselleiro delegado da Corporación Fillos de Rivera, mostrouse orgulloso de que a súa empresa continúe co legado solidario que mostraba o homenaxeado Moncho Rivera, colaborando neste caso coa Cociña Económica e a Fundación Curemos o Parkinson.

 

O directivo da cervexeira coruñesa finalizou cun chamamento á colaboración e á divulgación para que a recadación, que “irá íntegra para ambas as asociacións”, sexa o máis grande posible.