O Dépor realizou esta mañá en Abegondo o seu primeiro adestramento xa co playoff de ascenso a Segunda no horizonte.
Foi unha sesión de recuperación para os titulares onte en Pontevedra, con carreira continua, estiramentos e fisioterapia.
Para o resto do cadro, a xornada foi de forte carga de traballo, cun quecemento, un exercicio de finalizacións, unha tarefa de transicións e fútbol en espazo reducido para concluír, todo iso no campo 2 da instalación branquiazul.
Non se adestrou Alberto Quiles, co seu xeonllo dereito danado onte na segunda metade en Pontevedra; e estivo con adestramento personalizado Pablo Martínez, supervisado polo readaptador Alejandro Canosa.
Antes de saltar ao céspede, o equipo tivo sesión de vídeo. Onte en rolda de prensa, Rubén de la Barrera cualificou o tanto do Pontevedra CF como "unha primeira aprendizaxe" de cara a esta fase definitiva: "Nunha acción onde non damos profundidade a un envío, onde a única opción do porteiro deles era buscar a última liña, permítelles facer o gol e neses detalles conséguense ou non se conseguen obxectivos. Por tanto aprender diso. Saber que en calquera situación dese tipo de non correr atrás, despexes, non recuperar posición todos para gañar segundos balóns pode estar un ascenso ou non".
Asegura o adestrador coruñés que nos dous partidos de liga con el á fronte do Dépor, un en ABANCA-RIAZOR e outro fóra, permitiulle comprobar "xogadores, posicións, perfís... Permitiunos recoñecer rapidamente como está a xente, que nos pode achegar, que non e con esas conclusións imos ao bo, ao bonito, que está aí".
Os Nosos descansan mañá luns e regresan aos adestramentos o martes a partir das 10:30 en Abegondo, con almorzo previo ás 09:00 para futbolistas e técnicos.
A próxima cita para o Dépor será xa no camiño do ascenso, o partido de ida das semifinais do playoff. Ao quedar finalmente o Dépor en 4ª posición da clasificación na liga, o rival será o 3º clasificado do grupo 2º, o CD Castellón, xa a fin de semana que vén en ABANCA-RIAZOR. Rubén da Barreira precisa non obstante que "o camiño é mellorar o que fixemos o outro día; seguir mellorando en relación ao que fixemos hoxe; e ser o que queremos ser e facer o que queremos facer minuto a minuto. Temos moitísimas opcións de poder lograr o que queremos porque temos fútbol, forza, empuxe e hai que minimizar este tipo de situacións: nunha segunda parte onde non ocorre absolutamente nada en contra xérase unha posibilidade de disparo franco do Pontevedra", conclúe.
