O primeiro que fixo foi balance do primeiro ano á fronte da entidade deportivista: "foi un ano que tivo de todo, hai que quedar co bo e ser positivos, como sempre somos. Só hai que botar a vista atrás e ver como estabamos hai un ano. Normalizamos as cousas, chegamos a bos acordos comerciais e con Facenda; e no deportivo conseguimos o ascenso, estamos a competir en Primeira na zona do atasco na que, probablemente, este ano e o que vén, polo condicionante económico, é no que imos estar, pero imos conseguir o obxectivo".
Sobre o mercado invernal considera que se fixo: "un bo traballo. Teño que felicitar a Fernando Vidal, a Richard e a Ernesto, os artífices deste bo traballo. Tiñamos un bo persoal e agora témola mellor. E ademais hai un bo grupo, é algo recoñecido por todos".
Sobre a continuidade de Juan Domínguez, para Tino Fernández "está como estaba, pero moi preto, de feito falei co xogador na viaxe de Madrid e creo que lle imos a dar os toques finais ou deixalo cara ao final pero é fácil que se poida pechar pronto. Se tivese que apostar diría que queda. Nós queremos que quede porque nos interesa como futbolista pero tamén porque o considero un pouco un símbolo: é un dos nosos", sentenciou.
"O de Fabricio abordarémolo quizá cara a final da tempada, pero é evidente que tamén queremos que siga. Pasamos unha oferta e creo que se vai a quedar e vaise a solucionar".
Sobre o conflito aberto entre RFEF, LFP e CSD o presidente branquiazul opina que "o Deportivo está co fútbol, sinceramente espero que o conflito se solucione, o que necesita son menos medios de comunicación e declaracións, e tratar de buscar con máis reunións o rebaixar todo iso que non é bo para o fútbol".
Tamén valorou as propostas de sanción ao Club e ao presidente da Federación de Penas, Miguel Otero: "chameille despois de que se coñecese a proposta de sanción, que como a nosa é iso, unha proposta. O Deportivo non recibiu polo momento nin un papel, literalmente, da investigación oficial, do relato dos feitos, dos participantes e da proposta de sanción de todo o que pasou o 30 de novembro. Cando teñamos toda esa información valorarémola e sobre as propostas de sanción, defenderémonos".
Por último analizou a situación do acordo pendente co banco: "a información que temos é que Facendo non vai recorrer e o Club, concretamente eu persoalmente, fixemos unha proposta aos bancos para tratar de chega a un acordo con Facenda a partir da última sentenza sobre a repartición do diñeiro. Os bancos dixéronme que lles parecía ben, á súa vez trasladei unha proposta a Facenda o 1 de decembro e encaixou ben. A partir de aí propuxen a celebración de reunións conxuntas e niso estamos a traballar desde entón, o tratar a chegar a puntos de encontro, por iniciativa do Deportivo, e as partes están encantadas de tratar de atopar ese novo escenario e nós tamén buscamos un escenario mellor. O que quero é pechar dunha vez e que non haxa máis recursos para ter a folla de ruta económica que necesitamos".
