Antoñito recoñeceu esta mañá na sala de prensa que despois de dous partidos esixentes, sábado en ABANCA-RIAZOR ante o Córdoba CF e mércores en Badaxoz, "o cansazo nótase un pouco pero hai días de descanso para afrontar o partido do domingo coas máximas garantías", ante o Racing de Ferrol a partir das 19:00 horas (TVG-2 e InSports.tv).
O lateral deportivista, un dos futbolistas con máis experiencia no fútbol profesional, admite que no Cívitas Nuevo Vivero "soubemos que non estabamos activados desde o primeiro momento. Foi un deses partidos parvos".
Subliña que "non saímos coa intensidade que se merecía o partido e non hai que darlle máis voltas. Hai que seguir traballando máis forte, estar máis activados, máis concentrados nesta clase de partidos".
A pesar dos 10 puntos de desvantaxe agora co líder, asegura Antoñito que "nós imos partido a partido. As sensacións do partido ante o Córdoba témolas metidas na retina e cada partido tentar ofrecer esa versión, que é unha das mellores nosas. E hai que mantela. O partido de Badaxoz hai que borralo xa da mente e quedarnos coas cousas boas que fixemos co Córdoba e melloralas. Hai que mellorar día a día para que se vexa o mellor nivel, que temos moito".
É consciente o defensor deportivista que "non é fácil esta liga, con moitos rivais que che complican a vida, que xogan contra o Deportivo e é o seu partido do ano e van ao 100 por 100. Temos claro con que equipos enfrontámonos e hai que dar sempre o mellor de nós".
