A Real Federación Española de Fútbol determinou que o estadio Reino de León acollerá, entre o 8 e o 12 de marzo, a final a catro da Copa del Rey Xuvenil grazas á colaboración entre a propia RFEF, a Real Federación de Castela e León de Fútbol e o Concello de León, levando o desenlace do torneo do KO xuvenil ao campo municipal onde disputa os seus encontros como local a Cultural e Deportiva Leonesa.
O sorteo dos emparellamentos desta Final Four realizarase na Cidade do Fútbol de Las Rozas mañá mércores, 1 de marzo, ás 12:30 horas.
RC Deportivo, Athletic Club, Real Madrid e UD Almeria disputaranse no Reino de León este título que chega esta temporada á súa edición número 71. O Real Madrid é o vixente campión, despois de alzarse co trofeo en abril de 2022 no Anxo Carro de Lugo. A anterior e única semifinal de Copa para o Dépor foi na campaña 2010-11, despois de apear á Real Sociedad en oitavos e ao Real Madrid en cuartos. Naquela ocasión, o Xuvenil A foi eliminado polo FC Barcelona.
Nos próximos días, a RFEF ofrecerá toda a información sobre a venda das entradas dispoñibles para a final a catro de León 2023.
