RCD / NOVAS

O Dépor iguala #ONOSODERBI no tempo engadido (1-1)

05/05/2018 20:35

O Deportivo logrou salvagardar a súa honra e o seu orgullo grazas a un postremeiro gol de Lucas Pérez, que empatou #ONOSODERBI, un partido marcado pola igualdade e a intensidade, ante un Celta que se adiantou na primeira metade.

O preparador branquiazul, Clarence Seedorf, realizou unha soa permuta con respecto ao equipo que presentou o pasado domingo en ABANCA-RIAZOR fronte ao FC Barcelona. Borja Valle, titular fronte ao conxunto azulgrana, deixou o seu sitio ao recuperado capitán Adrián López.

O Celta adiantouse ao fío do cuarto de hora. Despois dun primeiro tramo de encontro repleto de intensidade por parte de ambos os bandos pero sen apenas accións reseñables, os olívicos marcaron o 1-0 por medio de Maxi Gómez. Pione Sisto disparou desde o extremo esquerdo, o balón rexeitou en Juanfran e foise moi alto. O globo caeu ao bordo da área pequena, onde Rubén non puido anticiparse ao dianteiro uruguaio, que cabeceou cara atrás ao fondo das mallas.

A tónica mantívose durante os seguintes minutos, cos dous equipos moi metidos no choque. Ata que no minuto 29, Rubén evitou o segundo gol local. O porteiro deportivista liquidou desviando a córner un man a man con Maxi Gómez, que tivo todo o tempo do mundo para pensar por onde batelo, após cortar un pase horizontal de Emre Çolak.

Superada a media hora, o Deportivo tomou o mando do encontro. Despois de provocar varios saques de esquina, Guilherme estivo a piques de igualar a contenda cunha impresionante volea desde 30 metros. Sergio Álvarez puido despexar a córner. Corría o minuto 36.

No minuto 39, Michael Krohn-Dehli e Lucas Pérez protestaron iradamente unhas posibles mans de Cabral após un centro do propio '7' branquiazul.

Malia os esforzos coruñeses no tramo final, chegouse ao descanso coa vantaxe mínima do equipo celeste.

A segunda metade arrincou co primeiro cambio nas filas deportivistas. Emre Çolak deixou o seu sitio a Fede Valverde. E comezou de novo dominador o Dépor, que pululou polos dominios de Sergio Álvarez nos primeiros minutos. Lucas non chegou polos pelos a un centro desde a dereita porque Cabral desviouno coa punta da súa bota. Adrián peiteou un córner botado por Lucas, pero Maxi Gómez despexou o balón de novo pola liña de fondo.

Respondeu o Celta no minuto 52, cun canonazo de Pione Sisto desde a frontal da área. Rubén rexeitou coa palma das súas mans e a defensa afastou o perigo.

Ambos os adestradores moveron os seus bancos á hora de xogo, aínda que cun simple intercambio de cromos. Primeiro, Seedorf deu entrada a Borja Valle en lugar de Adrián, mentres que Juan Carlos Unzué puxo no campo a Lucas Boyé na posición de Maxi Gómez.

Precisamente o dianteiro arxentino, nunha das súas primeiras accións, debeu ver o camiño dos vestiarios despois de golpear co brazo a Raúl Albentosa nun salto de cabeza. O colexiado resolveu a acción cunha cartolina amarela.

No minuto 70, o Celta viu como o árbitro, a instancias do seu asistente, anuláballe un gol por fóra de xogo. Daniel Wass remachou, lixeiramente adiantado, un centro de Hugo Mallo.

Dez minutos despois, dobre oportunidade para o Dépor. Primeiro, Andone non chegou a remachar un pase da morte de Lucas desde o extremo esquerdo. Na continuación desta xogada, Borja Valle recibiu de Fede Valverde, só na área, e o seu remate amorteceuno milagrosamente Sergio Álvarez, coa punta de bota esquerda. Aínda que o coiro saíu cara á portería, fíxoo tan mansamente que o porteiro céltico non tivo problemas para facerse con el.

Cando pasaban uns segundos do minuto 90, Lucas logrou o empate para o Dépor. Un saque de banda no extremo esquerdo recolleuno Guilherme. O brasileiro conectou con Andone, ao bordo da área pequena pero de costas a portería. O romanés deixou cara atrás para o dianteiro herculino, que fusilou sen remisión a Sergio Álvarez.

A pesar de que Boyé tivo unha clara ocasión e o Dépor gozou doutra máis nun saque de esquina, o marcador xa non se moveu. #ONOSODERBI concluíu así con mellor sabor de boca para a afección coruñesa que para unha inchada viguesa que xa celebrara por anticipado facendo a onda e atopouse cun inesperado empate.

RC Celta de Vigo: Sergio Álvarez, Hugo Mallo, Cabral, Sergi Gómez, Jonny, Wass (Roncaglia, min. 90), Lobotka, Jozabed, Brais Méndez (Tucu Hernández, min. 77), Maxi Gómez (Boyé, min. 63) e Pione Sisto.

RC Deportivo: Rubén, Juanfran, Albentosa, Schär, Luisinho, Krohn-Dehli (Andone, min. 75), Guilherme, Borges, Emre Çolak (Fede Valverde, min. 46), Lucas e Adrián (Borja Valle, min. 61).

Goles: 1-0 Maxi Gómez (min. 13); 1-1 Lucas (min. 90+1).

Árbitro: Del Cerro Grande (c. madrileño). Cartón amarelo a Luisinho (min. 6), Maxi Gómez (min. 54), Schär (min. 56), Hugo Mallo (min. 56), Boyé (min. 66) e Pione Sisto (min. 71).

Incidencias: partido da 36ª xornada de LaLiga disputado no estadio de Balaídos ante 20.816 espectadores, cuns 300 afeccionados deportivistas nas bancadas.

RCD / J36 LaLiga Santander

  • Sergio A.
  • Sergi Gómez
  • Jonny
  • G. Cabral
  • Hugo Mallo
  • B. Méndez (77')
  • Jozabed
  • Lobotka
  • Sisto
  • Wass (90')
  • M. Gómez (63')

Suplentes

  • Lucas Boyé (63')
  • Fontàs
  • Rubén Blanco
  • Drazic
  • P. Hernández (77')
  • Roncaglia (90')
  • Mazan
  • Rubén
  • R. Albentosa
  • Juanfran
  • Fabian Schär
  • Luisinho
  • Guilherme
  • Emre Çolak (46')
  • Celso Borges
  • Krohn-Dehli (75')
  • Lucas Pérez
  • Adrián (61')

Suplentes

  • Andone (75')
  • Valverde (46')
  • Bakkali
  • Pedro Mosquera
  • Fernando Navarro
  • Maksym Kóval
  • Borja Valle (61')

Estadio

Estadio de Balaídos (20.816 espectadores)

Goles

  • 1-0 (13'). M. Gómez
  • 1-1 (90+1'). Lucas Pérez

Árbitro

Carlos Del Cerro Grande amoestou aM. Gómez (54'), Hugo Mallo (56'), Lucas Boyé (66'), Sisto (71') do RC Celta y Luisinho (6'), Fabian Schär (56') do RC Deportivo.

RCD / Vídeo

RCD / Vídeo

Valora a #osnosos en #ONOSODERBI

#ANOSAFORZA
7,6
LUCAS
6,1
ANDONE
6,1
SCHÄR
5,9
BORJA VALLE
5,9
LUISINHO
5,5
ALBENTOSA
5,4
EQUIPO ARBITRAL
5,0
FEDE VALVERDE
5,0
EQUIPO TÉCNICO
4,8
GUILHERME
4,7
ADRIÁN
4,7
BORGES
4,6
ÇOLAK
4,6
KROHN-DEHLI
4,6
JUANFRAN
4,4
RUBÉN
3,6
O periodo de votación finalizou o 11-05-2018 10:00.