Aprobado o orzamento para a tempada 00-01: 9.944 millóns
A unanimidade nas votacións e as felicitacións polos logros deportivos no 2000 marcaron unha asemblea de accionistas na que se aprobaron as contas do exercicio anual e o orzamento para o próximo ano no que o Deportivo alcanza os 9.944 millóns de pesetas.
A asistencia ao Polideportivo da Sardiñeira foi escasa por parte dos accionistas, que preferiron delegar o seu voto noutros membros do accionariado do Club herculino. En segunda convocatoria só estivo representado o 11% do accionariado do Club, representado por 65 accionistas na Xunta Xeral Ordinaria e 63 na Xunta Xeral Extraordinaria. Os puntos da orde do día da Xunta Xeral Ordinaria, que correspondían á aprobación das contas anuais e a da xestión do Consello de Administración saldáronse con unanimidade nas súas respectivas votacións.
A Asemblea comezou coa proxección dun vídeo no que se mostraron os goles da tempada pasada, as imaxes da celebración do título de Liga e os goles nos partidos de UEFA Champions League así como imaxes das empresas do Grupo Deportivo que permitiron aos accionistas presentes gozar duns minutos rememorando os momentos de gloria máis recentes do Club.
Algún asistente mostrou o seu malestar polo novo formato da Copa do Rei que obriga novamente ao Deportivo a viaxar a Canarias para enfrontarse en dezaseisavos de final ao Tenerife. Así mesmo pediuse o cambio do videomarcador de Riazor e recalcouse a felicitación polos títulos alcanzados.
A Xunta Xeral Extraordinaria aprobou o orzamento de 9.944.500 pesetas tamén por unanimidade e a continuación o presidente do Consello de Administración presentou o Plan Quinquenal 2000-2005 que incumbe á expansión do Grupo de empresas do Deportivo da Coruña, a maior implicación cos socios fundamentalmente cos socios de ouro e a construción da Cidade Deportiva de Abegondo que será realidade nuns meses co patrocinio de cada campo de adestramento por un grupo empresarial completaron a orde do día.
