A dous días de regresar a ABANCA-RIAZOR para disputar o Trofeo Teresa Herrera, Borja Jiménez asegurou esta mañá en rolda de prensa que ten "moitísimas ganas de estar outra vez con #ANOSAFORZA, de volver pisar ABANCA-RIAZOR e de empezar o ano ou a temporada nova con moitísimas ganas".
Preguntado por Rubén Díez e Mario Soriano, que coincidiron ambos no terreo de xogo no último amigable disputado en Viveiro, opina que "o ano pasado xogou bastante por fóra, como Mario. Os xogadores de talento encaixan con bastante facilidade entre eles, ou sexa que non haberá ningún problema. Son dous bos futbolistas. A Mario xa o puidemos comprobar durante todo o ano, todas as cousas que nos achegou, o sentido que ten do xogo, o compromiso e o involucrado que está co Club, co corpo técnico. Contento coa súa volta e contento coa chegada de Rubén. Son dous bos futbolistas, que o poden facer á perfección xuntos e nas mesmas zonas do campo".
Sobre o mercado, indica que "aínda quedan días. Achégase o inicio e está claro que nos faltan xogadores. Está a traballarse niso. Xa sabedes como son os adestradores, moitas veces gustaríanos ter a todos desde o primeiro día, pero temos que ir adaptándonos ás circunstancias que temos. Este ano o mercado vai máis lento para nós e estamos a esperar boas opcións. Quedan por incorporarse polo menos dous xogadores ou sexa que con paciencia".
Respecto de Lucas Pérez, deixa claro que "necesitamos un dianteiro cos riscos que poida levar esperar até o final ou non. O que temos que facer é asinar un xogador nesa demarcación e nalgunha máis, pero hai que ir vendo os tempos do mercado".
Así pois, cre que "haberá entradas, haberá saídas. Non sei se nos próximos días ou non. Sabemos as necesidades. Vémolas todos e haberá que ter a mesma paciencia que tivemos até agora e que vaian incorporándose xogadores que nos poidan achegar e déannos cousas que non temos".
En canto precisamente ás saídas inesperadas, unha situación típica no sprint final do mercado estival, Borja Jiménez non espera "ningunha saída estraña".
Prefire non dar pistas sobre as demarcacións que hai que reforzar "para non encarecer nada, pero falamos máis ou menos das mesmas onde podemos interpretar que temos menor número de xogadores. Hai que esperar, ver que ofrece tamén o mercado. Está a traballarse moito desde a Secretaría Técnica para tentar ter o mellor cadro posible e temos que confiar en que así vai ser. Temos que confiar no seu traballo e ter paciencia porque acabarán chegando. Agora mesmo temos poucos xogadores para iniciar, pero non hai problema. Estamos moi contentos cos que temos".
De cara ao inminente inicio de liga, subliña aspectos da temporada pasada como o balón parado: "Creo que fomos o equipo que menos goles encaixou o ano pasado. Hai que darlle continuidade".
E, engade, "darlle continuidade ás cousas que fixemos ben e ás que fixemos mal, melloralas sabendo que o perfil dos xogadores lévache a ter un déficit en determinadas situacións do xogo, pero que á vez che leva a ter outras virtudes nas que nós priorizamos máis. Podemos complementar iso con traballo, como estamos a facer. Por traballo non vai ser e estámoslle dedicando moito tempo a todo iso, pero as características dos xogadores son as que son por moito que nos empeñemos nós en cambiar a un xogador. Iso é imposible. O que é bo nunhas determinadas situacións do xogo e noutras que lle pode custar máis, cústalle máis. Pásalle non só aos nosos, aos de todos os equipos. Todos os xogadores teñen virtudes e debilidades. Imos ver como se desenvolve o mercado e as posibilidades que temos".
