Derrota do Dépor que mereceu mellor resultado en Moscova

Miguel Anxo Lotina insiste unha e outra vez en que a liga é a gran prioridade do Deportivo. "A Uefa é un premio, e non imos renunciar a nada", engade en cada rolda de prensa. Esta tarde, no Luzhniki Stadium, o técnico vasco deixou fóra do once a Colotto, que nin sequera viaxou a Moscova; Sergio, Mista, Pablo Álvarez ou Lafita, estes dous con algunha molestia física; á marxe de Riki, que tamén quedou en casa ao estar sancionado. A competición non dá tregua e o domingo ao cinco da tarde agarda o Sporting e os seus máis de 3.000 seguidores que o animarán desde a bancada.

Así, a defensa foi para Manuel Pablo, Lopo, Ze Castro e Filipe. Antonio Tomás e De Guzman ocuparon a parcela central. Gardado caeu á esquerda e Cristian á dereita. Valerón actuou de enganche e Omar Bravo na punta de ataque.

O partido empezou a un ritmo alto, cunha temperatura máis que agradable para Moscova nesta época do ano e sen choiva nin neve. Valerón puido adiantar ao Deportivo tras recibir ao segundo pau totalmente só. Parou Akinfeev o remate algo centrado e raso do internacional deportivista. Corría o minuto 3 de partido.

Moi pronto se puxo por diante no marcador o CSKA de Moscova, que apenas inquietara a meta de Aranzubía. De Guzman, no minuto 8, derruba no bordo da área a Semberas. O colexiado pita a falta e Dzagoev coa o balón pola escuadra de Aranzubía.

Apenas tres minutos máis tarde, o dianteiro Wagner márchase de Lopo por velocidade na esquina da área e, ante a saída de Aranzubía, dá o pase da morte a Dzagoev, que só ten que empuxar para anotar o segundo tanto do partido. Dous goles en dúas chegadas con perigo. Lotina avisara do perigo e calidade do equipo ruso e bastaron dez minutos para deixar constancia do estado de graza que atravesa o equipo que dirixe Gazzaev, segundo clasificado na liga local.

O Dépor apertou e comezou a cercar a meta de Akinfeev. Cristian recibe totalmente só na banda dereita e, ante a saída do gardameta do CSKA, envíalle unha vaselina que salva o central Vasily Berezutsky na mesma raia de gol. Foi unha gran oportunidade para o 2-1.

O partido cambiou. O CSKA replegó filas e o Deportivo, con Valerón entrando moito en xogo e distribuíndo a esquerda e dereita, fíxose o amo e señor do centro do campo aínda que a acumulación de homes atrás do CSKA impediu que chegasen oclasiones claras de gol.

Tivo o terceiro nos seus pés o CSKA nunha xogada de estratexia perfectamente executada. Ao saque dunha falta, recibe raso no bordo da área Vagner, que, de tacón, deixa completamente só ante Aranzubia a Zhirkov. A meta vasco aguantou perfectamente e sacou co corpo.

A réplica do Dépor chegou pouco despois. Cristian, moi entoado, vaise do seu par nun caneo de fantasía que mesmo arrincou exclamacións de asombro na bancada. O seu centro raso desvíao Akinfeev e ninguén do Dépor foi capaz de colocar o seu rexeite.

O partido estaba toleado e disputábase a un ritmo altísimo. Aínda que o Dépor era o que máis posesión tiña, a calidade do ataque moscovita facía traballar de xeito abondo á defensa branquiazul. Ata o descanso non houbo variación no marcador.

Tras o descanso, o CSKA de novo sorprendeu ao Deportivo. Un calco do acontecido no primeiro tempo. Krasic centra desde a banda dereita ao segundo pau. Prolonga Ignashevich ao corazón da área e de novo Vagner, sen oposición e á media volta, cruza o balón logrando o 3-0. Desde logo o poder ofensivo do multimillonario equipo ruso quedou de novo demostrado.

Antes, Lotina refresca o mediocampo con Sergio en lugar de De Guzman, que volvía ao once despois dun tempo lesionado. Gardado, en bonita xogada persoal, xuta axustado ao pau no minuto 68. Akinfeev bloca perfectamente.

Sergio tivo nas súas botas o 3-1 que desde logo fixese máis xustiza ao que sucedía sobre o céspede. O centrocampista branquiazul recibe de Valerón na frontal da área e o seu chute colocado co interior márchase ao poste da meta de Akinfeev, que só puido ver a xogada sen poder intervir. Corría o minuto 76. A pesar do resultado, o Deportivo sempre tentou buscar o gol da honra. Lotina senta a Omar Bravo e sitúa no seu lugar a Mista, buscando un dianteiro máis estático e con capacidade de remate. Á súa vez, senta a Filipe, que o xogou todo ata a data en Liga, por Adrián López, para dar algo de descanso ao lateral brasileiro.

Ao final, derrota deportivista no estadio dun gran equipo, o CSKA, que non debe para nada afectar á moral do equipo, que se mide o domingo ao Sporting de Xixón en Liga; nin en Copa da UEFA, no que aínda restan tres partidos por disputarse nesta Fase de Grupos. O próximo será o Feyenoord en Riazor, a finais do mes de novembro.