Derrota no Vicente Calderón dun Deportivo que encaixou un tanto aos 40 segundos de partido
Un gol do Atlético de Madrid aos 38 segundos de partido condicionou o partido que o Deportivo disputou esta tarde no Vicente Calderón e que acabou perdendo por dous goles a cero. Mista, a sete para o final sentenciou o choque.
O resultado no Manzanares deixa ao Dépor decimosegundo na clasificación, con sete puntos por encima do descenso, posto que dos de abaixo, só gañaron os pechacancelas, Real Sociedade e Nastic, a Mallorca e Sevilla respectivamente.
Non houbo sorpresa na aliñación e Caparrós aliñou ao once habitual nesta segunda volta, co cambio obrigado de Coloccini polo sancionado Jorge Andrade. Galleti puxo o partido ao lado branquivermello antes do primeiro minuto de encontro. Antonio López centra desde a esquerda e o arxentino cruza o esférico para que Aouate non poida facer nada.
A partir de aquí, a formulación inicial deportivista cambiou radicalmente. Era necesario a partir de agora irse cara arriba para buscar o empate. Torres puido facer o segundo nuns minutos de desconcerto deportivista. No entanto, e con moito corazón, o Dépor conseguiu gañar terreo aos poucos e apertar a Leo Franco. Arizmendi no minuto 38 puido lograr o empate nunha das poucas ocasións nas que se zafó da marcaxe da zaga madrileña. Con esta boa ocasión e outra boa de Torres que salvou Aouate chegouse ao descanso.
Tras a continuación, Juan Rodríguez ocupa o dobre pivote con Sergio. Caparrós busca máis ambición no centro do campo, intención que redobrou coa entrada posterior de Verdú. A pesar de que o Deportivo saíu con máis pulo, Antonio López puido sentenciar no minuto 50, pero o seu chute foise ao traveseiro. A xogada clave puido estar no minuto 64. Varios deportivistas protestan ao colexiado do encontro, Mejuto González, unha man na área branquivermella tras un disparo de Estoyanoff, rexeite de Leo Franco e remate posterior de Arizmendi que foi abortado por un defensa atlético. Catro minutos máis tarde, Estoyanoff volve ter o empate nas súas botas, pero o seu chute o para Leo Franco.
Xa co Dépor claramente ao ataque, Taborda substituíu a Manuel Pablo, o Atlético sentenciou cun tanto de Mista a sete minutos para o final dun partido que deixou como unha das notas máis destacadas a gran marcaxe de Lopo sobre Fernando Torres. Agora, a pensar xa no partido do domingo ante o Xetafe en Riazor, ao cinco da tarde.
