Lendoiro: 'O fútbol é un deporte maldito', por Roberto G. Méndez

Augusto César Lendoiro (Corcubión, A Coruña, 1945), que non acumula máis emperadores no nome porque non lle caben, porque máis de dúas liñas cóntase biografía, porque algo terá tamén que escribir un, leva vinte anos á fronte do Deportivo, cumpriunos o día 13, e non é que se lle noten ou non se lle noten: é que pasaron. Vinte anos non é nada, salvo unha barbaridade, isto sábeno vostedes mellor que eu. Que teima de deixar as cancións a medias. Pois ben: un día Djukic tirou un penalti e fallouno Lendoiro, e outro día Lendoiro gañou unha Liga e dúas copas e o leite e o campión foi o Superdépor. É o que ten o fútbol, que ademais de ser fútbol e de ser así é unha cousa ingrata que descende aos clubs e ascende aos equipos, e tamén iso hai que saber levalo con deportividade, sen dar patadas, baixando o balón ao pasto e separando a pasta do balón, de ser posible. Porque o fútbol pode ser un deporte maldito, xa está aceptado que si, pero non é a única actividade na que se es o décimo sétimo, estás no ceo e se quedas décimo oitavo, é unha desgraza, iso xa non, hai bastantes máis casos. Pensen nunha regulación de emprego cando só fan falta dezasete. Tamén David Trueba cría que o fútbol era para humildes, porque é o único oficio no que podes facelo todo mal nun partido e gañalo e podes facelo todo ben e perdelo. Bobadas. Anda que non hai oficios así. Vivir, mesmamente. Total, que o Dépor debe 144 millóns, pero Valerón foi mellor que Zidane, unha cousa non quita a outra, isto é baixar o balón ao pasto e separar a pasta do balón, xa lles dicía, isto é non dar patadas: se non se gañan ligas, lémbranse, pero o tema, e tal, é tapar buracos, non caerse dentro.

Verán: cando eramos reis e alevíns e xogabamos en antigos vertedoiros e os balóns eran moito máis grandes que nós, ao presidente que molaba recoñecíaselle porque viña ao vestiario ao final dos partidos con caixas de cocacolas, pero o presidente que molaba máis era o que non viña, puña unha billa e co que se aforraba montaba outro equipo e xogabamos todos. Quero dicir que Lendoiro ten razón. Que toca billa.

O fútbol é un deporte maldito, xa non se cantas veces dixemos que si, pero antes ou despois dáche un penalti para que o tire Djukic, ou un centenario para que o amargues, ou ata unha final contra Alemaña. De que, se non, ía vivir ninguén vinte anos nel, adorando a Valerón.