O Deportivo ABANCA defende o liderado de Primera Federación FutFem mañá sábado 28 de xaneiro ás 12:00 en Tajonar ante outro rival directo, o CDF Osasuna, en partido correspondente á 17ª xornada.
A pesar da derrota do pasado sábado en Abegondo ante o CP Cacereño, primeira en casa no que vai de liga, As Nosas chegan a este partido á fronte da clasificación con 31 puntos, os mesmos iso si que CP Cacereño (2º) e SD Eibar (3º).
Irene Ferreras non poderá contar coas lesionadas Aroa Guerra, que se recupera dunha apendicitis; Samara, cunha lesión muscular no bíceps femoral dereito; e Laura Fernández, que aínda non está ao cento por cento do golpe recibido en Granada e que a levou ao hospital.
As Nosas recuperan a Henar, que se perdeu por sanción o partido ante o CP Cacereño. Aínda que a adestradora deportivista comentou en rolda de prensa que quedou "contenta, tranquila e satisfeita co partido de Letti Sevilla, agora recuperamos a Henar e volvemos ter esa alternativa aí. É unha xogadora que por ese físico, ese percorrido que ten e ese potencial é moi rechamante e o equipo parece que o nota cando non está. Pero temos que saber competir sen calquera delas. Vai ser por cartón, por lesións, por expulsións..."
Paula Monteagudo será a representante de #ANOSACANTEIRA. Irene Ferreras confesou que está "moi contenta co seu rendemento. O outro día (ante o CP Cacereño) tivo unha proba de lume, ver como competía contra un rival con ese poderío físico. Creo que fixo un partido moi bo. Ten que seguir mellorando cousas como todas".
Por contra, as navarras, que veñen de empatar en Lezama (3-3) ante o Athletic Club B, están na 7ª praza con 27 puntos, a tan só 4 puntos das deportivistas, o que demostra a gran igualdade na categoría.
De feito, a este respecto a adestradora branquiazul pide "manter unha regularidade e a pesar dunha derrota, que é o máis normal no fútbol, ter esa tranquilidade de xa mirar ao seguinte partido, que non nos afecte moito, que reenganchemos rapidamente esa vitoria outra vez, que nos manteña aí. Segundo váianse dando os últimos meses, xa iremos vendo onde estamos".
Na primeira volta, con motivo da 5ª xornada, o Dépor ABANCA impúxose (3-0) en Abegondo ás 'rojillas' con goles de Marta Charle, Laura Fernández e Sara Navarro.
Esta temporada en Tajonar, o CDF Osasuna volve ser un equipo fiable: gañou ao Córdoba CF (2-0), Athletic Club B (1-0), RCD Espanyol (3-2) e FC Barcelona B (1-0); empatou co CP Cacereño (0-0) e CD Alba Fundación Femenino (1-1); e tan só cedeu coa SD Eibar (0-1) e DUX Logroño (0-1).
Ademais, as pamplonicas xa están en cuartos de final da Copa da Raíña após prosperar ante o Xuíz Disciplinario a reclamación do partido de oitavos ante o FC Barcelona por aliñación indebida das azulgranas.
O equipo deportivista realizou esta mañá unha última sesión de adestramento na Cidade Deportiva antes de emprender viaxe a Pamplona, con esta folla de ruta:
Venres 27 de xaneiro
12:00: Saída do autocar de Abegondo, con parada para comer en Vega de Valcarce
21:00 (horario aproximado): Chegada ao hotel EXE Zizur en Zizur Maior (Pamplona)
Sábado 28 de xaneiro
12:00: CDF Osasuna - Deportivo ABANCA, en Tajonar
Ao concluír, regreso en autocar a Pamplona
O domingo 29 será xornada de descanso. As Nosas adestraranse de novo o luns 30 de xaneiro ás 10:00 na Cidade Deportiva.
