Ordes volverá organizar un dos DéporCampus Cabreiroá. RC Deportivo, a SD Órdenes e a Mancomunidade de Concellos de Ordes chegaron a un acordo de colaboración para manter a dita sede.
A localidade ordense repite experiencia nos DéporCampus Cabreiroá por segundo verán consecutivo, despois da súa estrea en 2017.
Á presentación do DéporCampus Cabreiroá 2018 de Ordes asistiron Roberto Rey (presidente da Mancomunidade de Ordes), José Luís Martínez Sanjurjo (alcalde de Ordes), Ana Soneira (concelleira de deportes de Ordes) e Toño Vázquez (representante da SD Órdenes). Pablo Barros, director dos DéporCampus, representou ao RC Deportivo.
Ordes será unha das sedes deste DéporCampus Cabreiroá 2018 cunha quenda, do 25 ao 29 de xuño. O Campo de Fútbol Municipal de Vista Alegre será a sede deste DéporCampus Cabreiroá, cuxas inscricións están abertas a nenas e nenos de entre 6 e 14 anos e poderán realizarse até o mediodía do xoves 21 de xuño.
Os DéporCampus Cabreiroá creceron de forma exponencial desde a chegada do actual consello de administración do RC Deportivo. Dun campus cunha única sede e menos dun centenar de nenos e nenas en 2013 pasáronse ás actuais 14 localizacións. Este verán estréanse 5 sedes: Ourense, Cuntis, Dumbría, Boiro e Camargo (Cantabria), que se suman ás xa existentes en Abegondo, Viveiro, Bertamiráns, Caranza, Monforte, As Pontes, Ordes, Zas e Xenebra (Suíza).
Podes atopar toda a información dos DéporCampus Cabreiroá en deporcampus.rcdeportivo.es/gl
