O Deportivo ABANCA encoméndase ao empuxe de Abegondo para dobregar ao DUX Logroño mañá sábado 24 de setembro ás 12:00, en partido correspondente á 3ª xornada en Primera Federación FutFem.
"Se xa de seu a afección é importante nun Club, para nós este ano se cabe é máis importante. #ANOSAFORZA demostrou estar a un nivel que eu noutro contexto non vivín", comentou onte mesmo en rolda de prensa Irene Ferreras, impresionada polo apoio que recibe cada partido desde a bancada o seu equipo.
Porque despois dun recentemente descendido como é o Rayo Vallecano na primeira xornada, liquidado cun rotundo 4-0, as branquiazuis reciben agora ao conxunto rioxano, un dos 'fanfurriñeiros' da categoría.
Ambos os equipos chegan ao encontro igualados a 4 puntos na táboa. É segundo clasificado o DUX por mellor diferencia entre goles marcados e encaixados: +5 por +4 o Dépor ABANCA.
O cadro granate arrancou a liga cun empate (2-2) ante o FC Barcelona B pero preséntase mañá na Cidade Deportiva branquiazul após unha goleada (5-0) a pasada semana no seu campo de Pradoviejo ante o Athletic Club B, con Paula Moreno como estrela ao anotar un 'hat trick'.
O último precedente entre ambos os equipos, en ABANCA-RIAZOR a temporada pasada, saldouse con igualada sen goles (0-0).
Despois "dunha semana de traballo boa, un pouco máis curta porque xogamos o sábado e iso varíache a planificación", Irene Ferreras, adestradora deportivista, conta para o choque de mañá coa baixa de Letti Sevilla e Carlota Sánchez, ambas as dúas na recta final da súa recuperación, tal e como a adestradora branquiazul explicou ante os medios de comunicación: "Todo o cadro está dispoñible menos Letti, que xa está a entrar con boas sensacións; e xa mañá (por hoxe) contamos en campo con Carlota Sánchez, o que significaría ter todo o cadro ao completo por primeira vez na temporada e alegraríanos unha chea".
A novidade na citación de 18 futbolistas para recibir ao DUX Logroño é o regreso de Lorena Reina após superar a súa lesión nun xeonllo.
O Club mantén activo o protocolo de apertura con control de accesos de Abegondo.
Todo o público debe retirar entrada, até esgotar aforamento e sen ningún custo adicional, para todas as persoas socias do RC Deportivo que o tramiten formalmente a través da web bancada.rcdeportivo.es, na que deberán introducir o seu ID de socio e 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada. Con eses mesmos datos doutras persoas socias, unha única persoa pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición, localización e aforamento na instalación. O RC Deportivo solicita que unicamente tramiten a entrada aquelas acodes socias que vaian poder acudir aos partidos, para evitar que queden afeccionados sen poder asistir unha vez completada a repartición do aforamento nun proceso 100 % telemático.
Tamén está habilitado o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
Tralo partido, o Dépor ABANCA descansa o domingo 25 de setembro e volve aos adestramentos o luns 26 ás 10:00 na Cidade Deportiva.
