O Dépor ABANCA sacou un punto da súa visita a un dos principais candidatos ao ascenso a Liga F, o recentemente descendido Alhama CF, que equilibrou na segunda metade o tanto inicial de Ana de Teresa no tempo engadido da primeira metade.
Nos primeiros compases do encontro, ambos os equipos dispuxeron de saques de esquina para levar perigo á portería contraria. Pero nin Alhama CF nin Dépor ABANCA conseguiron poñer a proba á gardameta rival.
O dominio territorial e de posesión do primeiro cuarto de partido correspondeu ao equipo branquiazul, que limitou os achegamentos do conxunto murciano e merodeou con frecuencia a área local. Con todo, apenas xerou oportunidades de gol, máis aló dun par de situacións que acabaron en saque de esquina, como un remate de Millene no segundo pau a centro de Ana de Teresa no minuto 16, e dun disparo excesivamente cruzado de Millene desde o bordo da área no minuto 21.
Como resposta local Paula Moreno tentouno desde fóra da área cun tiro que se marchou pola dereita da porteria deportivista. A propia Paula Moreno desperdiciou á media hora de partido a mellor ocasión local da primeira parte, após un desmarque de Belén, que centrou ao punto de penalti, e Paula rematou ás mans de Yohana.
Á media hora de encontro, cando ambos os equipos buscaban impoñer o seu xogo, nunha disputa dun balón dividido, Cindy e Ayaka chocaron, sendo a xogadora local a peor parada. Tivo que saír do partido en padiola, entrando no seu lugar Sandra.
Após varias ocasións do conxunto local, chegou a resposta do Dépor ABANCA. Primeiro, no minuto 39, cun disparo envelenado de Paula Gutiérrez, que a gardameta Laura Martínez desviou a córner coa xema dos dedos. Despois, no tempo engadido, após un córner desde a esquerda do ataque coruñés botado por Ayaka, que Ana de Teresa cabeceou ao fondo das mallas conseguindo adiantar ás branquiazuis.
A segunda metade comezou cun Alhama CF envorcado en ataque. O traveseiro impediu o empate no minuto 46. A cabezada de Estefa após un saque de esquina foi repelido pola madeira. O equipo local seguiu en busca do empate, facéndose co dominio do partido. Após varias xogadas de perigo, foi no minuto 60 cando o Alhama CF conseguiu igualar o marcador. Trala saída dun córner, Belén conseguiu regatear a varias defensoras herculinas, penetrando polo pico dereito da área grande, conseguiu un disparo diagonal ao recanto esquerdo da porteria visitante, ante o que nada puido facer Yohana.
Irene Ferreras buscou mover o equipo dando entrada a Eva Dios e Carlota, por Ainhoa Marín e Ayaka. O partido entrou nun tramo disputado no que ningún equipo conseguía impoñer o seu xogo ata que no minuto 71, unha entrada salvadora de Inés Altamira privou de adiantarse ás locais. Comezou o intercambio de golpes de ambos os equipos, aínda que ningún dos ataques conseguiu intimidar algunha das porterias.
No minuto 84, Irene Ferreras tentou oxigenar ao equipo, e fixo un cambio de pezas nos laterais. Cris Martínez e Sara relevaron a Samara e Clara.
Nos minutos finais ningún dos dous equipos parecía querer arriscar demasiado, os ataques de ambos os equipos non conseguiron xerar perigo e asinaron as táboas no José Kubala.
Con este empate, o segundo consecutivo, o Dépor ABANCA suma 23 puntos despois de 10 xornadas. As branquiazuis son segundas, a só 2 puntos do líder, o RCD Espanyol, e con 3 de vantaxe sobre o seu rival desta tarde, terceiro clasificado.
Alhama CF: Laura Martínez, Olivia, Judith, Lena, Alba Santamaría, Cindy (Sandra, min. 37), Estefa, Belén, Paula Moreno (Sara Medina, min. 85), Astrid (Pierina, min. 61) e Raquel Pinel (Kuki, min. 45).
Deportivo ABANCA: Yohana, Samara (Cris Martínez, min. 84), Inés Altamira, Raquel García, Clara (Sara, min. 84), Henar, Ayaka (Carlota, min. 63), Paula Gutiérrez, Ainhoa Marín (Eva Dios, min. 63), Ana de Teresa e Millene.
Goles: 0-1 Ana de Teresa (min. 45+4); 1-1 Belén (min. 61).
Árbitra: Claudia Cebollada López (c. valenciano). Cartón amarelo a Ana de Teresa (min. 44), Lena (min. 45+1), Sandra (min. 50), Ainhoa Marín (min. 52) Judith (min. 63), Kuki (min. 83), Millene (min. 69), Carlota (min. 88) e Olivia (min. 90).
Incidencias: partido correspondente á 10ª xornada de Primera Federación Iberdrola disputado no Campo Municipal José Kubala do Complejo Deportivo Guadalentín, en Alhama de Murcia.