O Dépor pechou o ano 2021 no máis alto da clasificación cunha nova vitoria a domicilio, en León fronte a unha Cultural y Deportiva Leonesa que chegou a equilibrar o marcador en dúas ocasións, pero que acabou cedendo os tres puntos grazas a un gol de Miku nas postrimerías do encontro.
O técnico branquiazul, Borja Jiménez, realizou dous cambios con respecto ao equipo inicial que presentou o pasado domingo na visita do Real Valladolid Promesas a ABANCA-RIAZOR. Víctor García e Lapeña regresaron ao once titular en detrimento de Trilli e Borja Granero. Deste xeito, o preparador deportivista apostou por volver xogar con catro dianteiros, con Quiles e William nos costados e Miku e Noel por dentro.
A pesar de que o Dépor volveu xogar unha vez máis case como en casa, arroupado por máis de 1.300 deportivistas polos escasos 4.000 fieis locais que completaron a asistencia ao Estadio Reino de León, o partido comezou cunha Cultural Leonesa con ganas de tomar o mando do partido. Froito diso chegou un primeiro disparo afastado e moi desviado, ás nubes, de Gaztañaga. Pero o Dépor pronto se fixo rápido co mando, empezou a controlar a posesión e a engarzar ataques con perigo.
Aínda que non foi até o cuarto de hora cando roldou con perigo a portería leonesa. Antes, no minuto 13, acción para a polémica nun esvarón de Dani Sotres, que saía a pés de William e que acabou cun plantillazo ao nocello do brasileiro. O balón aínda estaba no terreo de xogo, pero o colexiado decidiu non sinalar penalti.
A primeira ocasión clara, ademais dobre, chegou no minuto 16. Quiles conduciu un contragolpe pola dereita, trazou unha diagonal que acabou abrindo cara á esquerda para Miku, cuxo disparo golpeou nun defensa e colleu a contrapé a Dani Sotres, que aínda así respondeu rexeitando a pelota. A xogada continuou cun novo disparo de Miku ante o que volveu responder con acerto o porteiro local, despexando a saque de esquina.
Despois de que, no minuto 21, Álex Bergantiños enganchase un rexeite á saída dun córner e o seu remate desde a media lúa repeléseno as pernas dun defensa, chegou o primeiro tanto da tarde. Corría o minuto 28 cando Héctor Hernández dobrou por dentro a William e o duro disparo do lateral esquerdo, con pouco ángulo, despexouno como puido Dani Sotres. O balón caeu a pés de Miku que con tranquilidade, ao bordo da área pequena, colocou a pelota lonxe do alcance do gardameta do conxunto leonés.
Con todo, dez minutos despois empatou a Cultural Leonesa, no primeiro disparo a porta do equipo local, un canonazo afastado de Aarón Piñán que golpeou no traveseiro e acabou no fondo da rede. O gol encaixado non afectou ao Dépor, que tres minutos máis tarde, no 42, volveu poñerse en vantaxe. Un fenomenal centro tenso de Héctor Hernández desde o extremo esquerdo rematouno coa esquerda Quiles, lanzándose ao chan para anticiparse a Galas e Empis logrando o seu oitavo tanto no que vai de campionato.
O equipo leonés comezou a segunda metade un paso máis adiante e cunha marcha máis. Apertou o equipo de Curro Torres, pero tardou en crear algunha oportunidade. No minuto 56, Percan cabeceou moi desviado un saque de esquina. O mesmo resultado tivo no minuto 68 unha cabezada de Aarón.
Pouco antes, recentemente superada a hora de xogo, Borja Jiménez deu entrada a Diego Villares por Alberto Quiles, o cal non fixo retroceder ao Dépor, xa que o villalbés ocupou unha posición moi próxima a Miku. Pouco despois, quen deixou o terreo de xogo foi Noel para deixar o seu sitio a un Rafa de Vicente que se situou escorado á esquerda, practicamente como terceiro central.
A Cultural Leonesa volveu empatar o partido no minuto 70. Aarón fíxose cun balón sen aparente perigo, rodeado por tres deportivistas, na dereita do ataque leonés, e á entrada na área soltou un duro dereitazo raso e cruzado que se coou na portería de Ian Mackay pegado á cepa do pau contrario.
De novo o Dépor reaccionou con celeridade e, nada máis sacar de centro, William tratou de emular ao extremo dereito local. Nesta ocasión, o seu potente remate atrapouno Dani Sotres en dous tempos.
O partido entrou nunha fase embarullada na que a Cultural Leonesa tratou de facer valer o efecto de ser o equipo de casa. Os branquiazuis non escaparon do choque e mantiveron a fe até o final. O premio chegou cando o reloxo estaba a piques de sinalar o 90:00. Héctor Hernández lanzou en profundidade a Mario Soriano polo extremo esquerdo, o madrileño centrou co exterior, Cerrajería desviou o esférico cara á súa propia portería e Miku alcanzou a puntealo por baixo de Dani Sotres. Con todo, a pelota perdíase mansamente á esquerda do portal leonés, onde chegou veloz Víctor García para devolvela cara á área pequena. O porteiro atopouse co balón nos seus pés e o seu rexeite caeu nas botas, de novo, de Miku, que lanzándose ao chan introduciuno na portería local. O dianteiro venezolano deu o triunfo ao Dépor e co seu dobrete igualou a Quiles como máximo anotador branquiazul, con 8 tantos.
Os deportivistas controlaron á perfección os catro minutos de tempo engadido que concedeu o colexiado para sumar a súa undécima vitoria en 17 xornadas, a quinta en 9 partidos lonxe de ABANCA-RIAZOR. O Dépor pecha o ano 2021 con 37 puntos, no máis alto da táboa, con 4 puntos de vantaxe sobre o segundo clasificado, o Real Racing Club de Santander, 8 sobre o terceiro, o Real Unión Club de Irún, e con 10 sobre o sexto posto, o primeiro que queda fóra do playoff de ascenso. E faino como equipo máis goleador, empatado precisamente co seu rival de hoxe, con 28 tantos, e como menos goleado, con só 9 goles encaixados.
Cultural e Deportiva Leonesa: Dani Sotres, Riki Mangana, Amelibia, Galas, Empis, Cerrajería, Gaztañaga, Aarón, Diego Percan (Álvaro Juan, min. 71), Solís (Buenacasa, min. 85) e Ander Vitoria (Ketu, min. 86).
RC Deportivo: Mackay, Víctor García, Lapeña, Jaime, Héctor Hernández, Álex Bergantiños (Mario Soriano, min. 78), Juergen Elitim, Quiles (Diego Villares, min. 61), Noel (Rafa de Vicente, min. 67), Miku e William (Doncel, min. 78).
Goles: 0-1 Miku (min. 28); 1-1 Aarón (min. 39); 1-2 Quiles (min. 42); 2-2 Aarón (min. 70); 2-3 Miku (min. 90).
Árbitro: Pérez Muley (c. madrileño). Cartón amarelo ao segundo adestrador deportivista Álex Martínez (min. 31), ao adestrador leonés Curro Torres (min. 38), Riki Mangana (min. 50) e William (min. 66).
Incidencias: partido da 17ª xornada do grupo 1 de Primera RFEF disputado no Estadio Reino de León ante 5.483 espectadores, con máis de 1.300 deportivistas entre eles.
