Os Premios ‘Deporte Galego 2019-2022' da Xunta de Galicia recoñecerán o traballo de 22 persoas e entidades o vindeiro luns 20 de marzo na gala que se celebrará no Auditorio Municipal de Ribeira e na que se premiarán aos axentes máis destacados do deporte galego en 18 categorías.
O Diario Oficial de Galicia publicou o pasado día 13 a lista dos galardoados cos Premios Deporte Galego que, de maneira excepcional e por mor da pandemia, abarcarán catro exercicios: 2019, 2020, 2021 e 2022, polo que esta gala non se celebraba desde 2019.
Entre eles, como mellor equipo de deportistas con discapacidade, entregará o galardón (ex aequo) ao Dépor Genuine e o CD Lugo Genuine. Unha representación do equipo, futbolistas, técnicos e responsables estará o luns en Ribeira para recoller o recoñecemento.
Hai que destacar a dificultade das propostas e decisións do xurado dos premios que tiveron en conta a realidade do deporte galego durante este últimos catro anos. A Xunta quixo agradecer o esforzo de todo o tecido deportivo polo seu comportamento durante a pandemia e o recoñecemento pola súa rápida recuperación que contribuíu a que o deporte galego ratifique a súa posición como referente nacional e internacional.
Nesta ocasión, os premios que recoñecen aos máis destacados axentes do ámbito deportivo de Galicia distinguen a 22 premiados nas 18 categorías.
Lista de premiados:
-Mellor deportista feminina (ex aequo): María Teresa Portela Rivas (piragüismo) e Ana Peleteiro Brión (atletismo)
-Mellor deportista feminina con discapacidade: Adiaratou Iglesias Forneiro (atletismo)
-Mellor deportista masculino: Carlos Arévalo López (piragüismo)
-Mellor deportista masculino con discapacidade: Martín de la Puente Riobó (tenis en cadeira de rodas)
-Mellor equipo feminino: Club Deportivo Burela Fútbol Sala (fútbol sala)
-Mellor equipo masculino: Club Tríatlon Cidade de Lugo Fluvial (tríatlon)
-Mellor equipo de deportistas con discapacidade (ex aequo): Real Club Deportivo Genuine e Club Deportivo Lugo Genuine (fútbol)
-Mellor entidade na promoción do deporte de base: Club Básquet Coruña (baloncesto)
-Mellor adestrador ou adestradora: Miguel Martínez Méndez (baloncesto)
-Mellor árbitro/a ou xuíz/a: Manuel Franco Ojea (tenis)
-Mellor labor informativo: Galicia nos Xogos Olímpicos (Radio Galega)
-Mellor evento deportivo (ex aequo): Mundiais de Loita sub-23 e grappling de Pontevedra 2019 e O gran Camiño Cycling 2022
-Mellor patrocinio deportivo: Recalvi
-Mellor deportista revelación: Antía Jácome Couto (piragüismo)
-Premio ao xogo limpo (ex aequo): Escolas de Balonmán Xiria e Bueu Atlético Balonmán (balonmán)
-Premio Galicia Saudable á entidade de carácter público destacada no fomento e promoción da actividade física e hábitos de vida activa: Instituto de Investigación Biomédica da Coruña – INIBIC Sergas
-Premio Galicia Saudable á entidade de carácter privado destacada no fomento e promoción da actividade física e hábitos de vida activa: Fundación Abrente - Enki
-Premio Galicia Saudable á entidade educativa destacada no fomento e promoción da actividade física e hábitos de vida activa: IES Manuel García Barros
