En plena sexta onda da pandemia de COVID-19, e con multitude de casos en todos os equipos do fútbol español en todas as categorías, que mesmo obrigaron a aprazar por exemplo a xornada enteira desta fin de semana no grupo galego de Tercera RFEF, Borja Jiménez tivo esta mañá a todo o seu cadro sobre o céspede, na sesión diaria de traballo.
Así pois, a día de hoxe, todos os futbolistas do primeiro cadro están aptos para competir este domingo 9 de xaneiro en ABANCA-RIAZOR (12:00 horas, Footters) ante o CF Talavera, no primeiro partido do ano 2022, penúltimo da primeira volta da competición. Un perfecto agasallo de Reis Magos para o corpo técnico do líder do grupo 1º de Primera RFEF.
Noel, Trilli, Yeremay e Brais Suárez foron a representación de #ANOSACANTEIRA.
O corpo técnico branquiazul dispuxo hoxe xoves un quecemento, uns rondos e un partido once contra once a todo o campo para concluír.
Mañá venres 7 de xaneiro, o Deportivo adestrarase de novo a partir das 10:30 en Abegondo.
