Óscar Cano manifestou na sala de prensa do Cívitas Novo Viveiro que "o CD Badajoz foi xusto vencedor. Non nos atopamos en ningún momento no campo. Non parecía o meu equipo. Non dou crédito ao que vin e non podemos poñerlle panxoliñas á imaxe que demos. Non lembro un equipo meu facelo tan mal, tan rematadamente mal durante tantísimos minutos. Hoxe o fútbol foi xusto. O Badajoz mereceu gañar o partido antes do minuto no que o conseguiu. Non nos encontrabamos, moitos pases errados, controis... Non lembro un achegamento a portería. Estivemos absolutamente ridículos. Quitando a 3 ou 4 xogadores parecía que nos meteron aos curmáns dos que compoñen o meu cadro. Non parecía o equipo que viña competindo nestas xornadas".
O técnico branquiazul conclúe que "o Deportivo non estivo hoxe aquí no Nuevo Vivero".
Desvela que o vestiario está "cabizbajo, en silencio. Eles son conscientes de que hoxe non saíu nada e non puidemos competir. Hoxe calquera equipo gañarianos. Foi unha cousa realmente estraña porque eu non lembro un equipo meu facer un partido tan frouxo e tan malo. A tragar veleno, a aguantar todos os paus que nos teñen que caer e o domingo a tentar facelo da mellor maneira posible para tentar esquecer canto antes este ridículo espantoso que fixemos hoxe".
Non atopa explicación ao ocorrido e si son "partidos que se dan. Hoxe non nos atopamos. A formulación é o mesmo. Tratamos de levar o peso, de ter o balón, pero nin gañabamos duelos, nin estivemos conectados co partido. Foi un ambiente moi raro, a xente non se atopou. Non pareciamos o Dépor. Fomos un equipo doutra categoría inferior. Imos esperar que fose o día parvo que adoitan ter os equipos de cando en vez, tratar de esquecer rapidamente este día e o domingo tratar de competir da mellor maneira posible".
Sobre as baixas obrigadas de Olabe e Mario Soriano por sanción para o domingo, Óscar Cano advirte que "o cadro ten recursos suficientes para sacar un once de garantías en calquera lugar. Nos últimos minutos estabamos a defender ben pero na última acción deixamos sacar o centro e tragámonola no segundo pau. Imos ver como está o parte de guerra e a tratar de recuperarnos canto antes sobre todo a nivel mental porque temos un óso duro en ABANCA-RIAZOR. Vén o Racing de Ferrol e temos que reaccionar rápido".
