Como é habitual dous días antes de cada partido, Óscar Cano rebaixou esta mañá a carga de traballo do seu cadro.
Así, após uns rondos, o corpo técnico incidiu nunha tarefa de finalizacións e, a continuación, un último repaso ás accións a balón parado, aspecto que neste tramo importante da competición adquire se cabe máis relevancia, sobre todo nos partidos lonxe de ABANCA-RIAZOR, como o deste domingo 5 de marzo ás 12:00 (InSports.tv) no Estadio Municipal de La Línea de la Concepción fronte ao RB Linense, correspondente á 26ª xornada no grupo 1º de Primera Federación.
Max Svensson completou todo o traballo co grupo. "É a primeira vez que completou o adestramento co equipo. Pero foi un adestramento moi lixeiro, onde non houbo oposición, onde se traballaron algunhas cousas que non tiveron a esixencia que pode ter un adestramento normal e que queda moi lonxe ao que pode ser un partido", manifestou respecto diso Óscar Cano ante os medios de comunicación.
O técnico deportivista valora que "aos poucos imos podendo dispoñer de todos, que é o que máis nos gusta e o que ansiamos".
Pide prudencia con Max Svensson para "asegurarse de que ese proceso de recuperación ha ir ben e para ver como volve. Neste caso a confianza é total porque o corpo médico deste Club, os fisioterapeutas e os readaptadores son sensacionais desde o punto de vista humano e profesional".
Óscar Cano tamén desexa que a próxima semana, os dous futbolistas que están con adestramento individualizado (Jaime e Kuki Zalazar) "senón o 100% do tempo co grupo poderán ir entrando a participar co resto de compañeiros". "Van moi ben nos prazos. Aquí os prazos sempre se adiantan pola capacidade que teñen os responsables de que iso sexa así", engade.
Mañá sábado, Os Nosos adestraranse de novo ás 10:30 en Abegondo. Ao concluír, Óscar Cano dará a lista de convocados que pola tarde en avión, vía Málaga, desprazaranse a La Línea de la Concepción.
