Día forte da semana para Óscar Cano, que hoxe cos seus futbolistas trazou o camiño de cara a este domingo 19 de marzo ás 17:00 (InSports.tv) no Estadio Reino de León ante a Cultural y Deportiva Leonesa.
Así, após un quecemento con rondos supervisados polos preparadores físicos Luis Fandiño e Sergio Roca, o técnico branquiazul dispuxo unha serie de exercicios tácticos 11 contra 11 no campo 2 da Cidade Deportiva xa orientados ao choque ante a 'Cultu', correspondente á 28ª xornada no grupo 1º de Primera Federación.
Só Antoñito estivo con adestramento personalizado. En rolda de prensa, Diego Villares comentou que o defensa andaluz "ten unhas pequenas molestias que non sei se lle van a permitir chegar ou non ao partido. El confía en que si e todos esperamos que si".
Iso si, engade que Trilli, o seu recambio natural nese lateral dereito, "tamén está a adestrar ben e se lle toca xogar tanto esta fin de semana como os partidos que quedan, está dabondo preparado e pode facelo ben".
Mañá venres, Os Nosos están citados de novo en Abegondo ás 9:00 para almorzar e saltar ao céspede a partir das 10:30 horas.
