O Dépor caeu por primeira vez no que vai de temporada en ABANCA-RIAZOR, ante un RC Celta Fortuna que levou o partido nunha xogada que fixo honra á súa nova denominación e no que os branquiazuis, aínda que encerraron ao seu rival, non atoparon a forma de incordiar seriamente ao porteiro visitante.
Imanol Idiakez, adestrador branquiazul, modificou case a metade do once que perdeu na pasada xornada no Fernando Torres de Fuenlabrada. Mackay desprazou da portería a Germán por primeira vez no que vai de temporada. Os dous laterais, Paris Adot e Balenziaga, este lesionado, saíron do once para dar entrada a Ximo Navarro e Dani Barcia. Na zona ofensiva, caeron Hugo Rama e Davo e saíron de inicio Cayarga e Mella.
As cousas parecía que empezaban ben, pois o Dépor xerou dúas claras chegadas nos primeiros 10 minutos. No minuto 4, Ximo Navarro dobrou por dentro a Cayarga após unha apertura de Jose Ángel, pero o disparo do lateral destro foise a mans de Coke. No minuto 10, o propio Ximo Navarro foi quen chegou á liña de fondo e puxo a pelota ao punto de penalti para Pablo Valcarce, cuxo dereitazo de primeiras foise alto.
O partido entrou nunha longa fase sen achegamentos claros, ata que no minuto 32 o RC Celta Fortuna anotou o único tanto do partido. Pablo Durán remachou no segundo pau un balón bombeado despois de que un disparo de Alfon desde o extremo esquerdo rebotase en Pablo Vázquez.
O Dépor mantivo a cara ao partido e no minuto 41 estivo a piques de empatar mediante unha cabezada de Pablo Vázquez nun córner que se foi fóra por pouco.
O técnico deportivista realizou tres cambios no descanso, deixando na caseta a Ximo Navarro, Dani Barcia e Cayarga para dar entrada a Paris Adot, Jaime e Hugo Rama. O Dépor pasou entón a xogar cunha defensa de tres, e con Hugo Rama por dentro e Pablo Valcarce no extremo.
Pablo Martínez cabeceou fóra unha falta colgada por Lucas no minuto 49. A mesma acción foi rematada por Jose Ángel no minuto 61, pero esta vez a mans de Coke.
A xogada polémica do partido produciuse no minuto 63, cando Paris sacou velozmente un saque de banda para Lucas, que bateu a portería celeste. O colexiado anulou a acción porque había dous balóns sobre o terreo de xogo.
O Dépor esmagou nos minutos finais. No minuto 77, Pablo Martínez tentouno cun zurdazo desde a frontal da área que Javi Rueda sacou de cabeza a córner cando ía cara á portería. No 88, Martín Ochoa desviou un disparo de Paris desde o dereita pero o balón foise por riba do traveseiro. Xa en tempo de prolongación, Pablo Vázquez cabeceou un córner cara ao segundo pau, onde Davo rematou coa súa bota dereita pero estrelou o coiro no lateral da rede. Practicamente na última acción do encontro, Hugo Rama disparou desde 25 metros por encima do traveseiro.
Con esta derrota, segunda do curso e segunda consecutiva, o Dépor queda con 7 puntos despois de 7 xornadas, nas que unicamente logrou unha vitoria, no Anxo Carro ante o CD Lugo.
RC Deportivo: Mackay, Ximo Navarro (Paris Adot, min. 46), Pablo Vázquez, Pablo Martínez, Dani Barcia (Jaime, min. 46), Diego Villares (Martín Ochoa, min. 82), Jose Ángel, Cayarga (Hugo Rama, min. 46), Pablo Valcarce (Davo, min. 70), Mella e Lucas.
RC Celta Fortuna: Coke, Javi Rodríguez, Javi Domínguez (Dela, min. 88), Joel López (Tincho, min. 62), Javi Rueda, Damián, Miguel Román, Hugo Álvarez (Piay, min. 88), Raúl Blanco (Yoel Lago, min. 62), Pablo Durán (Bruno, min. 72) e Alfon.
Gol: 0-1 Pablo Durán (min. 32).
Árbitro: José Alberto Pardeiro Puente (c. cántabro). Cartón amarelo a Jose Ángel (min. 4), Pablo Martínez (min. 43), Joel López (min. 49), Damián (min. 77) e Javi Rodríguez (min. 90+4).
Incidencias: partido correspondente á 7ª xornada do Grupo 1 de Primera Federación disputado no Estadio ABANCA-RIAZOR ante 25.672 espectadores.
