Seedorf cita a 19 futbolistas para recibir ao FC Barcelona
Clarence Seedorf convocou a 19 futbolistas para medirse mañá domingo ao FC Barcelona (20:45 horas, Movistar Partidazo) no Estadio ABANCA-RIAZOR, en partido correspondente á 35ª xornada en LaLiga Santander.
A novidade na convocatoria é a entrada de Muntari, que recibiu onte a alta médica. Quedan fóra da lista de maneira obrigatoria Bóveda, Sidnei e Bakkali, este con molestias nun nocello.
No adestramento desta tarde, con Sidnei e Bóveda á marxe, o técnico holandés ordenou un partido táctico 11 contra 11 a todo o campo; e a continuación traballou accións de estratexia, a balón parado.
Un partido en espazo reducido e disparos a portería a cargo dos atacantes puxeron o punto e final á sesión.
Os convocados concéntranse esta noite no Hotel Meliá María Pita, á espera do partido.