Todos co Deportivo 2002 - 2003<br>Esta tempada si
Máis de 20.000 persoas déronse cita esta tarde en Riazor para dar a benvida ao Deportivo 2002 -2003, aos xogadores que xa estaban a pasada campaña e tamén ás caras novas. Riazor estreou os videomarcadores, que causaron unha gratísima impresión á afección
Os arredores do Estadio eran un auténtico fervedoiro de afeccionados branquiazuis desde primeira hora da tarde e despois, os seguidores deportivistas foron accedendo ao Estadio enchendo as dúas Tribunas e dando un magnífico aspecto ás Preferencias.
O acto, que como vén sendo habitual caracterizouse pola súa sinxeleza e sobriedade, estivo a presentar por Gandy, un dos compositores do himno deportivista, que introduciu primeiro aos compoñentes do persoal deportivista e despois ao corpo técnico e ao Consello de Administración do Club.
Os gardametas foron os primeiros en saír ao céspede, encabezados por Dani Mallo, seguido de Juanmi -un dos recentemente chegados- e Molina. Despois Aira, Héctor, César, Manel, Djorovic, Capdevila, Naybet, Andrade-outra cara nova-, Romeu, Manuel Pablo -uno dos máis aplaudidos pola súa recuperación- e Donato -a ovación fixo vibrar Riazor- saltaron ao campo.
José Manuel, Duscher, Fernando, Amavisca, Víctor, Toro Acuña -outra novidade-, Scaloni, Djalminha, Sergio, Valerón e Mauro Silva completaron o centro do campo e os dianteiros Changui, Pandiani, Iván Pérez, Tristán, Makaay e Turu Flores foron os últimos en saír, pechando a comitiva de xogadores o capitán Fran.
Despois Gandy deu paso ao corpo técnico, tamén moi aplaudido encabezado por Javier Irureta, e ao Consello de Administración do Club con Augusto César Lendoiro á fronte.
A única ausencia foi Jaime, que viaxou a Madrid para unha revisión médica con permiso do Club.
Fran agradeceu aos presentes o seu apoio incondicional e lembrou que aínda que en España xa se gañaron todos os títulos, este ano é o do Deportivo en Europa.
Javier Irureta brindou a tempada aos afeccionados, agradeceu o seu apoio e finalizou cun Aúpa Depor.
Augusto César Lendoiro deu a benvida ás novas incorporacións, fixo fincapé nos logros da pasada campaña e lembrou que as grandes festas sobran en actos como a presentación, que os auténticos protagonistas son os xogadores e técnicos do equipo. O presidente brindou os triunfos e agradeceu o apoio de todos os deportivistas no exterior, que animan ao equipo na distancia.
Nas bancadas de Riazor, con gran cantidade de afeccionados de fóra da cidade, xa que A Coruña vive estes días a súa semana grande das festas, volveron soar os aplausos.
En canto aos proxectos, Augusto César Lendoiro falou da Cidade Deportiva de Abegondo, á que definiu como "Abegondo, o mundo do fútbol".
