Vales y Asociados, bufete de avogados cunha estreita vinculación coa historia do RC Deportivo, convértese en novo patrocinador do Dépor Genuine.
O despacho coruñés dota de novo material deportivo ao Dépor Genuine para os seus adestramentos na Cidade Deportiva da Torre e Abegondo e a súa achega permitirá ademais a contratación de novos membros para o corpo técnico branquiazul nun acordo polo que resta de temporada 2022-2023 e a 2023-2024.
Vales y Asociados está dirixido por dous exxogadores do RC Deportivo, Pepe Vales e Marcos Vales. O primeiro, fundador do bufete, disputou máis dun centenar de partidos co equipo branquiazul entre 1970 e 1977, sendo partícipe do ascenso a Primeira de 1971 con só 20 anos. O segundo, fillo do primeiro, foi o autor do gol que clasificou matematicamente para competición europea por primeira vez ao Deportivo, en 1993. Ambos suman 146 partidos e 16 goles co Dépor e teñen en común que, a pesar das dúas décadas de separación entre ambos os debuts, deron o salto do Fabril ao primeiro equipo da man de Arsenio Iglesias.
Todo o cadro do Dépor Genuine recibiu de mans de Pepe Vales as súas novas camisetas, co logo de Vales y Asociados na parte inferior das costas. Desta maneira, Vales y Asociados súmase ao patrocinio de Duacode, que desde o mes de setembro apoia tanto ao Dépor Genuine como ao Dépor ABANCA e a outros apoios que ten o equipo como o da Fundación San Rafael.
