O Colexio Oficial de Médicos da provincia da Coruña, en colaboración co 061, organizou un Taller de Resucitación Cardiopulmonar (RCP) co obxectivo de sensibilizar á opinión pública e ás distintas Administracións sobre as urxencias vitais básicas e a importancia de contar con desfibriladores semiautomáticos e de persoal con coñecementos para o seu uso.
O taller celebrouse o martes 31 de xaneiro, na sede colexial de Salvador de Madariaga, e nel participaron destacadas figuras do mundo da televisión, o cinema, o teatro, o deporte e as institucións públicas. Entre elas, Ana González e Miriam Ríos, xogadoras do Deportivo Abanca; Xosé Ramón Gayoso, presentador de Luar da TVG; Miguel Ángel Blanco e Lucía Regueiro, actores e protagonistas da serie Serramoura; Sofía Toro, campioa olímpica de vela; Tito Díaz, adestrador do Basquet Coruña; Ángel Hernández, estudante de Medicina e capitán do Basquet Coruña; Carlos Gil, adestrador, e Toni Pérez, segundo capitán do Liceo de hóquei a patíns; Vanesa Rial e Paula Medín, do CRAT de rugby; Susana Rodríguez Gacio, médico e deportista paralímpica; e os presidentes do Parlamento de Galicia, da Deputación da Coruña, do Colexio Provincial de Farmacéuticos e do Comité Galego de Disciplina Deportiva, Miguel Santalices, Valentín González Formoso, Héctor Castro e Miguel Juane, respectivamente.
Como docentes interviñeron María Pichel López, David Vázquez Santasmarinas, Santiago Martínez Isasi e Roberto Barcala Furelos, do equipo investigador do Proxecto Anxos, que contaron coa colaboración de Antonio Iglesias, Antonio Rodríguez Núñez, Rosendo Bugarín e Luis Sánchez Santos.
A morte súbita de orixe cardíaca é unha das causas máis frecuentes de falecemento. En España morren por este motivo, cada ano, 25.000 persoas e, segundo datos do 061, en Galicia realízanse ao ano 700 RCP extrahospitalarias. Deles, 210 pacientes (o 30%), recuperan o pulso e son trasladados a un hospital, e sobreviven ao alta hospitalaria entre 90 e 105 (13-15%), con boa función cerebral.
Cando se produce unha parada cardiorrespiratoria, cada minuto que transcorre sen que se realice adecuadamente unha reanimación cardiopulmonar básica e actívese o sistema de emerxencias, a probabilidade de supervivencia diminúe un 10%. A implicación das testemuñas dunha parada cardiorrespiratoria como reanimadores efectivos e alertantes do sistema de emerxencias é imprescindible para aumentar a supervivencia a este problema de saúde pública.
Como se informou no taller, o primeiro que se debe facer é comprobar a seguridade da contorna, confirmar se o paciente respira, chamar ao 061 e solicitar un desfibrilador semiautomático para, seguidamente, iniciar a Reanimación Cardiopulmonar (con entre 100 e 120 compresións por minuto) ata que cheguen os servizos de emerxencia.
