Bakkali destaca en zona mixta o papel dos canteiráns do Dépor, como Francis e Edu
Zakaria Bakkali, Francis e Edu Expósito compareceron na zona mixta do Estadio ABANCA-RIAZOR, nada máis concluír a XIX edición do Memorial Moncho Rivera.
Precisamente Bakkali destaca que é "importante" o triunfo para a confianza do equipo porque "gañamos o partido, xogamos ben".
O internacional belga destacou a xuventude do Corinthians e aos canteiráns do Dépor: "Moi ben. Xogan como nós".
A meta nixeriano Francis, titular esta noite na portaría do Deportivo, subliñou estar "moi feliz. Non teño máis que dicir".
A súa primeira parada do encontro, un man a man co dianteiro Carlinhos, asegura que lle deu "confianza. Era a primeira acción. Foi unha boa parada. Subiume con ela a confianza".
De todos os xeitos, recalca que o seu papel no Deportivo "non cambia nada despois deste partido". É máis, di descoñecer "o que pensan de min. Para min a situación é a mesma".
Iso si, non oculta o seu desexo dalgún día ser titular no primeiro equipo, aínda que "por agora estou a pensar en crecer como xogador e aprender".
Finalmente Edu Expósito, autor dun bonito gol, conta esa xogada ante os medios de comunicación: "Piqueilla un pouco por encima ao defensa. Tentei xutar e golpeei coa perna menos hábil".
Neste sentido, apunta que "me gusta chegar á área. Agora estou a xogar máis atrás pero cando chego gústame disparar a portaría".
Cre que a súa participación co primeiro equipo é un "premio" ao seu traballo, e recoñece que "traballo cada semana para poder estar preparado para xogar. Pero iso decídeo o míster".
Esta noite, ante o Corinthians, explicou Edu Expósito que "eu estaba máis situado e Çolak tiña máis liberdade para dominar o balón e filtrar pases".