RCD / NOVAS

Borja Jiménez asegura que pase o que pase nestes dous partidos "o equipo chega preparado ao momento da verdade, ao playoff"

20/05/2022 17:34

Borja Jiménez manifestou esta mañá na sala de prensa de ABANCA-RIAZOR que "as cousas positivas de cara ao playoff xa as mostrou o equipo durante todo o ano. As sensacións do equipo van ser boas. Fixemos un ano bastante bo polo número de puntos que levamos, por como se mostrou o equipo e non vai condicionar nada o que ocorra estas dúas semanas para saber que o equipo chega preparado ao momento da verdade, a xogar os playoffs. Logo poderá pasar que vaia ben, mal ou regular, pero o equipo vai chegar ben porque o demostrou, porque estou con eles no día a día e porque é así, independentemente de que mañá podamos gañar, perder ou empatar e o sábado seguinte. Nin o equipo vai chegar con máis moral por gañar estes dous partidos ou con menos. O equipo está xa moi centrado en todo o que ten que facer, imos acumulando adestramentos, imos preparando cousas de cara a ese playoff, axustando o que cremos que ten marxe de mellora no equipo".

Subliña que "cando cando te vas a xogar todo o ano primeiro nunha semana e oxalá daquela a seguinte, o nivel de concentración, o nivel de compromiso con facer ben as cousas é moi alto. Non nos vai a influír os resultados para saber que o equipo chega en bo momento", conclúe.

Do partido de mañá sábado 21 de maio no Anexo ao Estadio José Zorrilla (20:30, Footters e Fuchs-Sports) de Valladolid admite que é "a nivel particular especial, porque á parte da miña cidade é onde adestrei por primeira vez en Segunda B. É un club ao que gardo moitísimo agarimo polo que significou no meu inicio de carreira e tamén un pouco pola proximidade da miña cidade. Sempre te sentes un pouquiño identificado, ou sexa que contento de volver alí, de volver ver a moita xente que deixei como amigos, que seguen no club. É un partido un pouco diferente para min, especial, moita familia pola miña banda é de Valladolid. Contento nese aspecto".

O adestrador branquiazul indica que é "un partido que imos necesitar para certificar ese segundo posto até a resolución definitiva do tema de Bilbao. Afrontámolo como cada partido agora, unha final e de preparación para o que vén nos próximos días. Moi concienciados, sabendo que alí houbo equipos que, no seu momento o Racing ou o Badajoz, non foron capaces de gañar, dos que están aí arriba. Vai ser un partido difícil onde eles teñen que apurar as súas opcións de salvación e nós conseguir o segundo posto".

Advirte que non se verá nada novo nestes dous partidos no Dépor: "O equipo durante todo o ano mostrou diferentes formas ou diferentes estruturas para xogar e agora é cuestión de dar continuidade. Non creo que sexa momento de inventar nada porque durante moitas fases do ano funcionounos todo moi ben, case durante todo o ano excepto mes e medio. E agora o equipo está outra vez ben de resultados, de xogo, con boas sensacións. É momento de que todos cheguen ben no mellor momento posible, coa confianza moi alta e dar continuidade ao que nos funcionou case durante todo o ano".

Preguntado polas accións de estratexia, opina que "estamos a ver un pouco os resultados do traballo de todo o ano. Neste sentido inflúen moitos factores, primeiro o lanzador, que colla esas distancias; daquela os rematadores un pouquiño máis de acerto. Durante todo o ano fixemos goles a balón parado. Lembro a xornada 2 de Lapeña, aquí ao Sanse... É verdade que se cadra agora neste tramo estamos a facer case en cada partido, pero o traballo é o mesmo en canto a dedicación, en canto a análise e depende un pouquiño tamén do acerto. Imos cambiando en función da defensa rival, en función do que queiramos facer nós, dos nosos rematadores. A diferenza nisto do fútbol é que cando entra a pelota parece que fas mellor o teu traballo que cando non entra, pero traballo houbo sempre; o que pasa é que agora estamos a ter ese chisco de sorte tanto no lanzamento como no remate que sempre fai falta".

Sobre a renovación de Villares, Borja Jiménez mostrouse "contento por el. É un xogador que a nós nos achegou moito, que foi moi importante durante o ano, que á parte de todo o futbolístico é moi bo rapaz. Todo o bo que lle poida pasar a el eu persoalmente alégrome porque é e foi un currante do fútbol para chegar a isto e cumprir o seu soño. Estar nun club como o Deportivo é cumprir un soño para calquera futbolista".

Máis novas de: BORJA JIMÉNEZ