RCD / NOVAS

Bóveda dá a primeira vitoria ao Dépor no minuto 90+7 (2-1)

18/10/2020 21:37

O Deportivo sumou a súa primeira vitoria na estrea ligueira da Temporada 2020-2021, nun partido no que apenas pasou apuros en defensa ante un Salamanca CF UDS que con todo vendeu cara a súa derrota. Os branquiazuis adiantáronse nada máis comezar a segunda metade, o cadro salmantino empatou nun dos seus únicos tres tiros nos 90 minutos de xogo e Bóveda deu o triunfo ao Dépor con croque no sétimo minuto de tempo engadido.

Fernando Vázquez apostou por un esquema 4-3-3, por momentos 4-1-4-1, con Álex Bergantiños como eixo da medular, con Nacho González e Celso Borges por diante, mentres que Keko ocupou o extremo dereito e Lara situouse no esquerdo. A aposta na portería foi Carlos Abad, mentres que o elixido para actuar como ariete foi Claudio Beauvue.

A primeira metade, do mesmo xeito que a segunda, tivo un claro dominador no Deportivo, que levou o peso do encontro desde o inicio do mesmo.

Non tardou en chegar a primeira ocasión clara, nunha boa internada de Keko Gontán polo extremo dereito. O centro do madrileño alcanzou a tocalo Claudio Beauvue, que practicamente na área pequena chegou polos pelos e non puido dirixir a súa cabezada. O coiro perdeuse lonxe da portería salmantina.

Mediada a primeira metade, o gardameta visitante erixiuse en protagonista ao desviar un potentísimo dereitazo de Lara. O extremo esquerdo moveuse cara ao costado contrario, desde onde sacou un lategazo ao que Javi Jiménez respondeu como puido. O rexeite do meta charro caeu a Borges, cuxa volea saíu moi desviada.

O Salamanca CF chegou por primeira e única vez aos dominios de Carlos Abad no minuto 33. Ernest Ohemeng internouse pola dereita, pero o gardameta deportivista tapou ben a chegada pola liña de fondo do ganés, que tratou de sorprender cun duro disparo sen apenas ángulo.

A segunda metade arrancou co primeiro gol do partido. Un centro pasado de Keko desde a dereita chegoulle no extremo contrario a Salva Ruiz, que centrou de primeiras con precisión ao punto de penalti, onde Claudio Beauvue cabeceou completamente só, lonxe do alcance de Javi Jiménez.

Os deportivistas acrecentaron o seu dominio buscando ampliar diferenzas, sempre por medio de Nacho González. O uruguaio disparou desde a frontal da área, desviado, nos minutos 48 e 58. Pasada a hora de xogo, rematou acrobáticamente outro centro de Salva Ruiz, pero o coiro foise ás nubes.

Pouco despois, Carlos Abad intervinó decisivamente para rexeitar a saque de esquina un libre directo lanzado polo recentemente ingresado Jorge Mora. No devandito córner, o porteiro deportivista despexou de puños e a pelota caeu a Candelas na frontal da área. O lateral esquerdo visitante empalmou unha volea en parábola coa que restableceu o empate no marcador.

Fernando Vázquez reaccionou cun triplo cambio. Uche Agbo, Gandoy e Borja Galán saltaron ao céspede en lugar de Borges, Nacho González e Lara. Deste xeito, o Dépor pasou a xogar co esquema máis habitual na pretemporada, cun dobre pivote e con dous dianteiros, con Keko acompañando en punta a Claudio Beauvue.

Seguiu dominando o Dépor. As continuas perdas de tempo do Salamanca CF UDS fixeron que o reloxo correse demasiado rápido para os intereses coruñeses. O conxunto branquiazul apenas conseguía pisar a área contraria, pero cando o facía era con meridiana claridade. No minuto 83, Borja Galán anticipouse ao seu marcador para rematar fóra, coa súa bota dereita, un centro de Bóveda. Máis clara foi a opción de Borja Granero, xa en tempo engadido. O central, completamente só ao bordo da área pequena, non foi capaz de dirixir a súa cabezada a saque de esquina de Keko.

Ante as recorrentes perdas de tempo dos charros, o colexiado acabou engadindo tres minutos máis aos cinco que sinalara nun principio. E foi cando se cumpría o sétimo minuto de prolongación cando chegou o tanto do triunfo. Miku baixou na media lúa un balón longo de Mujaid, deixouno cara atrás para Álex, que abriu para a esquerda cara a Gandoy. Este centrou ao corazón da área para un desmarcado Eneko Bóveda, e o lateral dereito bateu a Javi Jiménez cunha nova e inapelable cabezada.

RC Deportivo: Carlos Abad, Bóveda, Mujaid, Borja Granero, Salva Ruiz (Derik, min. 84), Nacho González (Gandoy, min. 71), Álex Bergantiños, Borges (Uche Agbo, min. 71), Keko (Miku, min. 84), Claudio Beauvue e Lara (Borja Galán, min. 71).

Salamanca CF UDS: Javi Jiménez, Nacho López, Delorenzi, Kristian, Leo Sepúlveda (Jonathan Lacerda, min. 88), Candelas, Fer Llorente, Sergio Molina, Telles (Amaro, min. 82), Ernest Ohemeng (Diego Chávez, min. 46) e Uxío (Jorge Mora, min. 64).

Goles: 1-0 Claudio Beauvue (min. 46); 1-1 Candelas (min. 66); 2-1 Bóveda (min. 90+7).

Árbitro: Alemán Pérez (c. As Palmas). Cartón amarelo a Borges (min. 39), Nacho González (min. 41), Leo Sepúlveda (min. 45), Lara (min. 63) e Uche Agbo (min. 90).

Incidencias: partido da 1ª xornada do Subgrupo A do Grupo 1 de Segunda División B disputado no Estadio ABANCA-RIAZOR, por primeira vez con público nas bancadas, con capacidade reducida, desde o inicio da pandemia do COVID-19.