Un dos galegos do Deportivo, o meta Dani Giménez, foi o protagonista esta mañá na sala de prensa de ABANCA-RIAZOR, en vésperas do derbi ante o CD Lugo deste domingo 19 de maio no Anxo Carro (20:00 horas, LaLiga 1|2|3 TV).
Admite que "todo pasa por gañar en Lugo. Todo o que non sexa gañar para nós é negativo. Ao final en Segunda División hai máis oportunidades, pero todo o que non sexa gañar, comprometería o resto da temporada".
Por este motivo, asegura que "o equipo só pensa nos 3 puntos e de feito é plasmar a melloría que estamos a ter nas últimas semanas. Necesitamos seguir gañando contra un equipo necesitado. É un partido onde se vai a ver esa intensidade e esa tensión de algo máis de 3 puntos. Necesitamos gañar un partido así".
Iso si, quixo deixar claro que "para nós o ascenso é igual de importante como para o CD Lugo non descender. Eles teñen partidos complicados logo como Tenerife, pero é un partido que para os dous equipos é unha final".
Aínda que recoñece que fóra de ABANCA-RIAZOR "estamos a sacar mellores resultados, non creo que sexa mellor xogar fóra. A melloría que vimos contra o Cádiz plasmala fóra. Fomos fortes, competimos ben estando replegados e aproveitando as nosas oportunidades á contra. Pero tamén podemos levar o peso do partido".
Dani Giménez de cara a esta recta final, pide ser "un equipo xunto. O que nos está penalizando é a separación entre liñas. É verdade que cando metemos gol, cando estás a xogar cousas importantes che desajustas un pouquiño porque é certo que en certos momentos vímonos atrás e deixamos demasiado espazo entre esas liñas. Ao final os equipos rivais estúdannos, saben os nosos aspectos negativos".
"Cando somos un bloque sólido, cando temos as liñas xuntas, somos un equipo ao que é difícil meterlle man. Temos xente rápida arriba para aproveitar eses contraataques. Temos claro un par de aspectos que temos que mellorar. Estivémolo traballando estas últimas semanas", conclúe.
Un dos capitáns branquiazuis subliña que o equipo está "máis forte" a nivel de crer nas súas posibilidades. "Mentalmente demos un paso adiante. O partido do Cádiz viuse a xente que estaba atenazada ultimamente cun pouquiño máis de desenvoltura. Nótase nos desmarques, nos apoios, en querer o balón. Ir a Lugo exactamente igual. Ir a Lugo mellorando e sen perder esa solidez que tivemos ultimamente. É complicado ver ese Dépor dominador fóra de ABANCA-RIAZOR. Pero adaptámonos e o que estamos a facer está a irnos ben".
Agradeceu "moito" o apoio que terá o equipo este domingo nas bancadas do Anxo Carro, con "xente que vén dalo todo por apoiar ao seu equipo. Ter á túa afección aí detrás reconforta".
A nivel individual e colectivo, subliña que "todos temos altibaixos durante a temporada. Todos temos xogadas desafortunadas. O importante é, tanto individualmente como equipo, cando te caes levantarte. Traballo para ser fiable, para seguir en forma, para tentar ser importante e axudar ao equipo".
Para concluír, quixo desexar Dani Giménez "moita sorte ao Deportivo ABANCA que leva encamiñada a eliminatoria de ascenso á Liga Iberdrola. Falta pouco".
