RCD / NOVAS

David Simón cre na súa presentación que o Dépor necesita "moito traballo, unión e sacrificio"

31/07/2018 14:22

David Simón Rodríguez Santana (Las Palmas de Gran Canaria, 16 de decembro de 1988) foi presentado esta mañá en Abegondo como novo xogador do Real Club Deportivo para as dúas próximas temporadas.

Acompañado por Carmelo del Pozo, Director Deportivo do Club, posou en primeiro lugar para os medios gráficos no campo principal da Cidade Deportiva; nunha estampa xa tradicional nesta pretemporada.

Xa na sala de prensa, tomou en primeiro lugar a palabra Carmelo del Pozo para "darlle as grazas a David pola súa incorporación. Foron uns días un pouco complicados. Persoalmente demostroume unha implicación persoal e profesional dada a súa situación mesmo contractual. Tivo unha rescisión nas Palmas e aínda así el, sen ter a situación pechada literalmente, tivo un compromiso importante que é digno de agradecer. El tiña outras opcións encima da mesa, con papeis, máis importantes economicamente. E entendeu que o proxecto era moi bo e iso é digno de agradecer. Simplemente grazas por todo".

A continuación, o novo lateral deportivista púxose a disposición dos medios de comunicación.

Explica en primeiro lugar a decisión de vir ao Dépor: "o Deportivo é un equipo grande, un equipo histórico. Teño moitos referentes de xogadores canarios que pasaron por aquí e lles foi moi ben. E despois de falar con Carmelo, desde que me dixo se quería vir para acá, a miña primeira opción foi o Dépor".

Conta que se empeza a soltar cos compañeiros, "paseei un pouco pola cidade, gústame moito. Adaptareime moi rápido", apostila.

Herdeiro, con Gerard Valentín, do lateral dereito que ocupou outro canario, Manuel Pablo, durante moitas temporadas, David Simón manifestou respecto diso que "foi un referente para min nese posto porque é canario, por todo o que conseguiu. Traballarei moito, e sobre todo gozar de estar aquí, nun gran campo, con grandes instalacións, e nunha gran cidade".

Nesta liña, desvela que aínda non puido falar con Manuel Pablo desde a súa chegada á Coruña, aínda que ten "moitas ganas de velo. Pero si falei con Rubén Coméndez, co que coincidín no Vecindario. Falei con Valerón, Aythami, con Momo cando estaba alí. Todos me falaron moi ben de aquí".

Confesa que se decidiu a deixar As Palmas porque "necesitaba un cambio xa. Desde que terminou a temporada comuniqueillo a Las Palmas. Eles querían contar comigo, pero ao final sempre fun profesional alí, nunca din ningún problema e iso entendeuno o presidente. O compromiso e a profesionalidade que tiven leváronme a que chegase a un acordo".

Como futbolista, indica que "co sistema que imos xogar podemos ter máis liberdade os laterais. Definiríame por dar 100 % traballo meu e 100 % polo equipo. Despois poden saír as cousas mellor, ou as cousas peor. Se sae todo ben podemos gozar moito tanto o equipo como a afección este ano".

Da súa última temporada no Las Palmas, David Simón recalca que "o último ano non xoguei tanto como eu quería porque foi o ano malo. O equipo descendera, todo era unha pequena tolemia. Cando as cousas van mal poden pasar moitas cousas. Traballei moito. Merecía máis oportunidades alí e veño buscalas aquí".

Advirte que esta campaña para lograr o ascenso "hai que traballar moito, día a día, domingo a domingo. Todo vai saíndo con traballo, esforzo; e para min é moi importante gozar, que todos esteamos xuntos e a unión de todos, xogadores, Club e afección".

A poucos días de arrancar unha Segunda División con moitos ex equipos de Primeira, David Simón subliña que "a Segunda sempre é moi dura, moi longa, moi competitiva. Si é verdade que este ano hai moitos equipos históricos, moitos equipos que queren aspirar ao ascenso. Hai que ser moi regular e temos que ser un dos aspirantes, pero con moito traballo, moita unión e moito sacrificio".

Entre os favoritos, o defensor deportivista ve aos 3 equipos recentemente descendidos (Deportivo, Las Palmas e Málaga): "Son os referentes para conseguir o ascenso. Pero isto é moi longo. O máis importante é ser regulares e ir paso a paso".

Máis novas de: DAVID SIMÓN