Gaizka Garitano asegurou esta tarde en rolda de prensa en Abegondo que "temos postas moitas esperanzas no partido de mañá", de Copa do Rey ante o Betis (21.00 horas, Bein Sports), correspondente á volta de dezaseisavos de final. "Imos ver se podemos sacar entre todos a eliminatoria adiante", comenta respecto diso.
Cualifica o encontro fronte aos béticos como "unha final. De non gañar, ou de non obter un resultado suficiente para pasar a eliminatoria, quedamos eliminados dunha competición na que queremos seguir".
Subliña por tanto que o Deportivo afronta este choque copeiro "coma se fose un de liga, coa mesma mentalidade. Con ganas de gañar, sabendo que temos un resultado adverso de 1-0. Temos que tentar darlle a volta".
O técnico deportivista insiste en que "para os dous equipos é igual de importante. Non queremos quedar eliminados da Copa. Eles están a facer as cousas moi ben. Será un rival de Primeira División, difícil. Nós confiamos en que en Riazor, na nosa casa, coa nosa xente e as ganas que temos de pasar, podamos facer un bo partido ter unha boa noite".
Lembra que "historicamente aquí conseguíronse cousas moi bonitas na Copa. E estoullo lembrando constantemente aos xogadores. Vivíronse grandes noites de Copa. O Club vive moito deses recordos, deses títulos. Porqué nós non imos chegar lonxe nesta competición?"
A pesar da boa traxectoria e as boas sensacións nos últimos partidos, Garitano rebaixa o nivel de euforia: "Nin antes eramos tan malos nin agora somos tan bos. Temos que ter os pés no chan, temos que seguir mellorando".
