- Foto: @SeFutbol -
Dous canteiráns, Juan Rodríguez e Mella, incorporáronse hoxe luns ás concentracións das seleccións españolas sub-18 e sub-15 respectivamente.
Ambos os futbolistas foron titulares esta pasada fin de semana co Fabril en Ourense e co Cadete A en Abegondo ante o CD Calasanz respectivamente.
Juan Rodríguez debuta mañá na Copa do Atlántico
O xuvenil Juan Rodríguez disputará con España sub-18 a 46ª edición da Copa do Atlántico, que se celebra na illa de Gran Canaria desde mañá martes 28 de xaneiro.
Titular indiscutible no Xuvenil A de División de Honra, Juan Rodríguez leva xa varios partidos no filial de Terceira División ás ordes de Luisito.
Mañá martes, Eslovaquia será o primeiro rival de España, a partir das 18:30 no Municipal de Maspalomas, sito na localidade de San Bartolomé de Tirajana.
O canteirán branquiazul ten este calendario de partidos no combinado que dirixe o exdeportivista Pablo Amo:
Martes 28 de xaneiro
18:30: ESPAÑA - ESLOVAQUIA, no Municipal de Maspalomas (San Bartolomé de Tirajana)
Mércores 29 de xaneiro
18:30: ESPAÑA - XAPÓN, no Anexo ao Estadio Gran Canaria
Venres 31 de xaneiro
18:30: ESPAÑA - MÉXICO, no Anexo ao Estadio Gran Canaria
O regreso á Coruña será o sábado 1 de febreiro, co tempo xusto para a seguinte cita ligueira do Fabril, o domingo 2 de febreiro ás 17:00 en Abegondo ante o CD Arenteiro.
Mella xogará en San Pedro del Pinatar
Pola súa banda, David Mella foi citado pola selección española sub-15 para disputar 3 encontros internacionais nas instalacións de Pinatar Arena, sitas na localidade murciana de San Pedro del Pinatar.
Así, o combinado nacional que prepara Julen Guerrero ten este calendario de partidos:
Xoves 30 de xaneiro
13:00: ESPAÑA - REPÚBLICA DE IRLANDA
Sábado 1 de febreiro
13:00: REPÚBLICA CHECA - ESPAÑA
Luns 3 de febreiro
16:00: ESPAÑA - PAÍSES BAIXOS
Mella concentrouse con España hoxe luns 27 de xaneiro. O dianteiro deportivista, que suma 8 goles en 18 partidos disputados esta temporada en liga, será baixa obrigada co Cadete A a próxima xornada, na súa visita ao Racing de Ferrol prevista para o sábado 1 de febreiro (10:15, A Gándara 1).
