Lopo será operado este martes para acabar coas súas molestias nas costas
Albert Lopo será sometido este próximo martes a unha operación quirúrgica no Instituto Dexeus de Barcelona polo doutor Enric Cáceres, que estará acompañado polo traumatólogo do Deportivo Rafael Arria
O motivo da intervención médica é acabar definitivamente coas molestias que sufría o futbolista derivadas da súa hernia discal sufrida a finais de setembro de 2007.
Rafael Arriaza explicou en rolda de prensa no Estadio de Riazor a conveniencia de realizar neste período de vacacións esta operación nas costas de Albert Lopo. "Demos moitas voltas a este tema desde hai uns días e coas probas que lle fixemos hoxe, témolo bastante claro", indicou Arriaza, que estimou en seis semanas os prazos para a súa recuperación.
Ademais, o traumatólogo deportivista cualificou de sorprendente "a súa recuperación despois da hernia sufrida polo futbolista en setembro. En tres meses practicamente empezou a xogar e xa non parou ata o final. E cunha capacidade de sufrimento que é para quitarse o chapeu", engadiu Arriaza.
