Luis Ángel César Sampedro (Vilagarcía de Arousa, Pontevedra, 3 de maio de 1966) foi presentado esta mañá como novo adestrador do RC Deportivo na sala de prensa de Abegondo, minutos antes de saltar ao céspede co cadro branquiazul.
O novo adestrador branquiazul estivo acompañado polo Presidente, Paco Zas; o Director Xeral, José González Dans; o Director Deportivo, Carmelo del Pozo; e o Delegado do equipo, Juan Ángel Barros Botana.
O Presidente, en primeiro lugar, deulle a benvida e desexou que "esta situación deportiva que vivimos todos con preocupación podamos afrontala da mellor maneira posible. Unha das características que pediamos ao Director Deportivo é que fose un home con experiencia, con capacidade, que coñece perfectamente a categoría e ao Deportivo porque é evidente. Vive preto da Coruña e ao mesmo tempo, algo que queriamos conseguir que é darlle ao cargo de adestrador do Dépor a galeguidade. Hai que identificar o máximo posible ao Club coa nosa rexión".
Aclara que o peso do Consello de Administración na súa fichaxe é "como todos os procesos que vivimos deste tipo. O proceso sempre é o mesmo. Informe da Dirección Deportiva e decisión do Consello". "Hai un executivo que é o Director Deportivo, ao cal se lle dan unhas premisas. En función desas premisas, el fainos unha proposta. E esa proposta elíxea o Consello por unanimidade. Non houbo nada máis. Rapidez, concreción e ter preparadas armas", engade.
Ademais, explica que entre o luns pasado (data da súa última rolda de prensa en ABANCA-RIAZOR) e o pasado luns 30 de setembro "houbo 2 partidos. En Girona despois do partido tiñamos todos unha preocupación grande. Expoñémonos dous posibles escenarios, unha vitoria o domingo ou que pasase algo negativo e ter que tomar unha decisión. Ordenamos á Dirección Deportiva que se puxese a traballar nese sentido. Loxicamente un equipo profesional ten que estar preparado para todo".
Desencadea a decisión "a dinámica de non gañar. Cando un equipo entra nunha dinámica de non gañar, mesmo chega a afacerse a iso. Non queriamos de ningunha maneira que os profesionais se afixesen a non gañar. Iso é o que máis pesou na nosa decisión", aclara Paco Zas.
A pesar deste escenario, lembra que "estamos en outubro e hai posibilidades para todos. Sigo mantendo o mesmo obxectivo que é, como mínimo, xogar a promoción de ascenso".
Desvela o plan a seguir no Club, que "mesmo comentamos co persoal do Club, co persoal executivo, co persoal directivo. A miña aspiración como Presidente é galeguizar ao máximo todo o equipo, todo o Club, para conseguir unha identidade que nos aproxime moito máis á afección; e conseguir que o Club sexa moito máis participativo na sociedade nosa, que é a galega e a coruñesa".
Sobre as protestas dos afeccionados, Paco Zas afirma que "son libres de facer o que lles pareza nese momento. Contra iso podo traballar, ser responsable. Non podemos deixar que esa situación nos afecte á hora de tomar decisións. Este Consello toma as súas decisións. E non pode estar a pensar o que opina un grupo de afeccionados, un grupo de accionistas... Quen sexa. O Consello, eu, tomo, tomamos as nosas decisións. Non hai ninguén que fóra do Consello participe nelas. Para nós o máis importante é o Deportivo. Ninguén máis. Agradecemos a todos o apoio que nos dan, os patrocinadores: ABANCA, Estrella Galicia e todos os demais; cada abonado que saca o seu abono. Fóra diso, somos un Consello forte, unido e que tomamos as nosas decisións. No momento no que alguén queira influír ou chegue a un límite de atosigamento tal que nos inflúa, nese momento non estamos capacitados para dirixir o Club".
Pola súa banda, Luis César en primeiro lugar destacou que chega "a un gran club, de moito prestixio a nivel nacional e un referente a todos os niveis".
Confesou estar "moi ilusionado e moi contento de estar aquí. Levo moitos anos de adestrador. Hai moitos anos que veño a ABANCA-RIAZOR a ver ao equipo. Vin aquí partidos memorables a finais dos 90. En todos estes anos, cando vivín fóra, sempre fun do Deportivo. Cando vivín preto, vin moitas veces a ABANCA-RIAZOR. Hoxe cúmprese un soño. Sempre soñei cun día estar no banco do Deportivo. Cando viña aquí a finais dos 90 a ver ao Súper Dépor, as xestas contra equipos como o Manchester ou o Milan, sempre soñei con estar nese banco. Hoxe cúmprese ese soño e estou tremendamente feliz".
Recoñece que o equipo ten "un déficit de puntos con respecto ás xornadas disputadas. Hai equipos que están felices na clasificación e outros están peor. Hai equipos que están cómodos, que fixeron un bo inicio. O Dépor non o fixo. Pero non é indicador de nada. A Segunda División é unha liga de xeiras. Hai que saber navegar nas series positivas. Cando ganas saber por que ganas. Ás veces ocorre que ganas e pensas que todo está ben feito e despois cando vén a xeira mala, facendo o mesmo que facías, non sabes por que. É importante cando ganas saber por que ganas para cando perdas tratar de sabelo. Hai tempo para todo. Non é un tópico. É o que penso e sinto. Ninguén conseguiu nada. Nin o Cádiz que ten 25 puntos pode asegurar e asinar que xa está en Primeira División. Nin ninguén pode asinar nin asegurar que nós estando nesta situación abaixo na clasificación, xa non podemos alcanzar nada que poidan conseguir os equipos que nos preceden. Esta liga é distinta a Primeira División. É todo moito máis igualado. As diferenzas económicas son grandes pero non son enormes como en Primeira. Isto é unha liga de ser consistente e resistente; e tratar de ser mellor cada semana. Veño aquí a por todo, a alcanzar a máxima posición posible. E creo que hai tempo dabondo para facelo. Así o digo porque así o penso".
Asegura que lle gusta o cadro e "sei que hai moitos futbolistas que non están na súa boa versión. Entre todos temos que facer que brillen e tratar de buscar o máximo rendemento. Vin futbolistas de nivel que o demostraron noutros sitios e polo que sexa, até agora, algúns renderon ben, outros regular e outros non tan ben. Vexo a un cadro moi bo. En Segunda División somos todos parecidos. Non é como Primeira. Aínda que haxa algúns equipos que teñan un puñado de millóns de euros máis son poucos. Se eses equipos que teñen máis diñeiro confúndense e non conseguen a boa versión de 4 ou 5 futbolistas caros, todo iguálase. Por iso sobe o Mallorca o ano pasado e hai sempre algunha sorpresa".
Tentará Luis César que o Dépor sexa "un bo equipo semana a semana. De facer os puntos que hai que facer para conseguir os obxectivos. O que queira ser primeiro ou segundo ten que facer tantos puntos cada mes, cada 4 partidos. Os que queiran chegar ao playoff teñen que facer uns poucos menos e os que teñen que salvarse teñen que facer: 5 puntos ao mes por 10 puntos, son 50. Isto é moi duro, moi longo. Confío no cadro e penso que se poden facer grandes cousas. Hai que traballar moito e ben; e ser resistente e esforzado".
Preguntado polo ambiente de crispación que rodea ao equipo, indica que "pola experiencia que teño, estiven en varios equipos e sempre hai resultados positivos, negativos. Hai equipos que loitan polo ascenso, outros polo descenso pero ao final sempre se fala de cumprir obxectivos. Hai meses que se estás no obxectivo, estás feliz e contento. Se estás dous meses fóra do obxectivo, xérase de todo. Todo isto arránxase con resultados positivos. Eu voume centrar en darlle á afección o que quere: gañar e xogar o mellor posible; gozar co seu equipo. Ir a ABANCA-RIAZOR, ver un bo partido e que o seu equipo gañe. Se iso sucede a xente ao final está contenta, a xente vai ao campo a ser feliz. E a xente é infeliz vendo ao Deportivo en postos de descenso. E o seguinte vén detrás diso. Iso é o motor de todos os desencontros. Este equipo se tivese 8 puntos máis, habería outro ambiente seguro".
Insiste que vén ao Dépor "a por todo. A por todo é ir semana a semana, mes a mes... Temos un déficit de puntos que temos que ir reducindo mes a mes. O déficit de puntos que temos a día de hoxe non os imos a reducir en 3 partidos. Seino dabondo. Non vexo ao Cádiz en Primeira División aínda. E se lle preguntas ao adestrador do Cádiz, dirache o mesmo que eu. Teno máis fácil que todos os demais. Sei que o segundo o ten máis fácil que os outros 20. Uns o teñen mellor, uns están felices, outros están ben e outros estamos tristes e mal na clasificación".
