RCD / NOVAS

Muntari: "O Dépor ten ADN de ser un gran Club, un histórico"

25/02/2018 15:33

Un campión de Europa, Sulley Muntari, pasouse esta mañá pola sala de prensa da Cidade Deportiva de Abegondo.

Apuntou estar moi feliz nesta nova etapa na súa carreira deportiva: "A liga é unha das mellores ligas do mundo. O estadio é fantástico, é un dos clubs históricos. Todo o mundo coñece ao Dépor. Faime moita ilusión xogar aquí".

É máis, recalca o internacional ganés que "a cidade é preciosa, é tranquila, é limpa. A xente é guay".

Após disputar os seus primeiros minutos de xogo, poucas horas despois de completarse a súa documentación, agradeceu a confianza de Clarence Seedorf: "Desde que cheguei recibíronme moi ben, tanto compañeiros como traballadores, o equipo médico e o corpo técnico. Moi contento de estar aquí".

Despois de varios meses sen competir, Muntari explica que non ten un prazo de tempo para alcanzar o seu óptimo estado de forma, "está todo na mente. O importante é xogar xuntos, estar unidos. Estou listo e preparado para xogar en calquera momento que se me necesite porque estamos nun momento no que hai que sobrevivir. Isto non é unha situación, vémolo como un momento".

Preguntado pola posibilidade de ser titular, sostén que iso "depende do adestrador, do que el queira. Eu adestro ao cento por cento duramente toda a semana para axudar ao equipo. Non vin aquí para ser un espectador máis".

Explica a súa chegada ao Dépor: "Penso que o meu nome chegou ao Club, e cando o viu o adestrador foi o que dixo que me trouxesen. Pero quería ver como estaba. A verdade é que cando mo dixeron, non mo pensei dúas veces. Vin".

Do Club, apunta Muntari que "unha vez que chego aquí e vexo os xogadores, que son incribles... Isto é un momento, non é unha situación e creo que imos saír de aí".

Confesou ter máis opcións ademais da do Deportivo, pero decantouse pola Coruña porque "estivo en Champions, ten ese ADN de ser un gran Club. É un histórico.Ten esa mentalidade gañadora. É un equipo incrible e como dixen antes, isto é un momento. Elixir a este Club foi fácil para min. Ademais tiña un ex adestrador aquí".

Non quere pensar o seu futuro máis aló do que resta desta temporada. Está convencido que "non imos descender. Imos dedicar todas as nosas forzas para manternos en Primeira e o que ocorra logo, xa se falará despois".

Di de Seedorf, co que coincidiu como compañeiro no céspede e logo xa como técnico, que "é incrible, unha inspiración telo como compañeiro. Agora é o mesmo, só que non está no campo. Dime as mesmas cousas que cando era xogador".

Aprecia agora no técnico holandés que "madurou moito. Acababa de ser xogador e aínda pensaba como xogador. Gañou experiencia nos últimos anos, agora está máis tranquilo, fala cos xogadores individualmente para meterse nas súas cabezas, para sacarlles o mellor".

Máis novas de: MUNTARI