Vicente Gómez pasou esta mañá pola sala de prensa de Abegondo, antes de arrancar a sesión diaria de adestramento do Deportivo.
O centrocampista branquiazul apuntou que co empate do pasado sábado en ABANCA-RIAZOR ante o Alcorcón "todos fomos conscientes de que hai esperanza, de que o equipo estivo ben. Doutra banda te quedas con que estando ben e sendo superior, non fomos capaces de gañar o partido. Agora o que nos fan falta son as vitorias. É importante tamén as sensacións pero ao final os puntos é o que nos está facendo falta".
A nivel persoal, dixo atoparse "ben. Xa tiña ganas de xogar un partido así completo e que tamén fose boa actuación do grupo. Estou contento porque non é fácil estar fóra, sobre todo cando vas perdendo e ves que o equipo non está ben e non tes oportunidades. Pasan moitas cousas pola cabeza. O que ten que facer un é adestrar, estar en silencio traballando e esperando a oportunidade para cando chegue, tentar aproveitala".
Ante a saída ao Anxo Carro de Lugo este domingo 1 de decembro (18:00 horas, Movistar LaLiga), explica que "temos que gañar. Moitas veces iamos coa formulación de gañar como sexa e agora imos coa formulación de gañar coa nosa idea e como o fixemos o último día. Por aí saímos máis reforzados, imos máis positivos, imos con máis argumentos a lograr unha vitoria".
Nin sequera fálase no vestiario deportivista, segundo desvela Vicente, do partido ante o CD Lugo como un derbi galego e si como "un partido para nós vital. Cada vez vanse esgotando para nós as posibilidades. É duro falar así en novembro ou principios de decembro que as posibilidades se van esgotando. Vémolo como unha finalísima. Cambia o escenario, cambia o equipo pero o traballo noso ten que ser moi parecido ao do outro día. Mantendo a portería a cero, mandando no partido, xogando ao que queremos nós, o máis normal é que vaian chegando as vitorias".
Precisamente destaca o mediocentro branquiazul que ante o Alcorcón foi "a primeira vez que o equipo se pareceu máis ao que facemos no día a día; e aos bos xogadores que temos no equipo". "Somos un equipo que adestra de luns a sábado dunha forma, todo moi ben, e non te explicas como o domingo todo sae ao revés. Todo o que fas durante a semana non es capaz de repetilo o día do partido", reflexiona.
Recalca que a raíz do partido ante o conxunto madrileño, "após vir dun tempo que non estabamos ben, quizais saltou un clic na cabeza e dicir 'quizais non somos tan malos'. Sabemos que se estamos nese nivel de activación e nese nivel de actitude de querer a pelota e saír a gozar do fútbol, as cousas van cambiar seguro máis pronto que tarde".
Valora como "importantísimo" manter esas sensacións o domingo no Anxo Carro de Lugo pero advirte que "ao final de sensacións un non vive. Igual axúdanos a liberar un pouco a mente e a estar máis confiados en nós, sobre todo no de á beira. Ao final é clave gañar. As xornadas van pasando e se non gañas, vaise complicando todo moito máis".
Ademais, lembra que "nós o pasamos mal porque ninguén neste cadro viviu esta situación. A todos os que estamos nesta sala de prensa se nos din ao principio que iamos estar nesta situación, ninguén o cre. Entón cando un vive unha situación para a que non está preparado é complicado darlle a volta. Todos nos demos conta de que hai que darlle a volta da forma que sexa porque se non isto váisenos das mans".
