RCD / NOVAS

O vestiario deportivista fai autocrítica e toma este partido como lección

15/09/2018 23:17

Os capitáns Álex Bergantiños e Dani Giménez tomaron a palabra na zona mixta do campo de Santo Domingo.

O mediocentro coruñés indica que fallou a adaptación ao encontro: "Sabiamos que ía ser un partido de moitas disputas, de moitos duelos. Cando non os vas gañando, cando perdes balóns, eles son intensos, xeran moitas faltas. Ao final non estás cómodo en ningún momento. Faltounos adaptarnos a iso. Quizais golpear un pouco máis ao espazo, facerlles correr cara atrás e que non estivesen cómodos nesa presión e interpretar mellor o partido incómodo que nos estabamos atopando. Cando estabamos un pouquiño mellor chegou o gol deles, nunha perda nosa e un pase atrás. A partir de aí foi máis do mesmo, moitas faltas, moita interrupción, segundas xogadas. Non soubemos impoñernos niso".

Lembra Álex que o que pasou esta noite en Alcorcón "é o que se sofre fóra de casa. Hai que adaptarse canto antes. Servir de lección este tipo de partido. Aquí sempre se sofre. Temos que mellorar na capacidade de disputa nos duelos e segundas xogadas porque vai haber moitos campos nos que se dea este tipo de partidos".

Advirte que o conxunto madrileño é un equipo que "aquí é moi forte, sente moi cómodo neste tipo de partidos. Interpretárono perfectamente. Presionaron moi ben após perda, facíannos golpear incómodos, non ser precisos, e non tiñamos continuidade. Faltou interpretar mellor ese desborde de filtrar pases que lles fixesen correr cara atrás e se estás nesa dinámica, eles están cómodos e non atopas a maneira de facer dano".

Pola súa banda, Dani Giménez subliñou que "o Alcorcón no seu campo mantén unha intensidade durante os noventa e tantos minutos bestial. Van a todas as xogadas. E dáse que este ano están a xogar moi ben. Mesmo tiveron a paciencia que nós non tivemos en determinados compases do partido".

O meta galego confesou que tiña esperanza de meter un gol que igualase o marcador. "Quizais o equipo con máis corazón que cabeza tentou ir a polo empate. Fixen un par de paradas, pero o gol é un infortunio, porque se non se desvía é unha parada alcanzable, aínda que é certo que estaba a merecer máis o Alcorcón", sostén.

Insiste Dani que "aínda queda moito. Vimos dun gran partido contra o Sporting. Está a custarnos finalizar, quizais esa pausa para elixir o mellor compañeiro de cara ao gol. Pero isto é un partido diferente".

Asegura que "se alguén pensa que imos gañar con suficiencia todos os partidos equivócase. Os equipos en Segunda son o que son. Eu subín 2 veces con 2 bos equipos e custounos até o final. Hai que ser moi fortes mentalmente. Imos estar aí arriba segurísimo. É ir partido a partido, tentar ir crecendo. Cando as cousas saian mal, aproveitar eses erros para mellorar e que o equipo siga crecendo".

Máis novas de: ÁLEX, DANI GIMÉNEZ