RCD / NOVAS

Riazor recupera o orgullo (0-0)

23/02/2018 23:27

O Deportivo fixo todo o traballo necesario, todos os merecementos posibles para sumar os 3 puntos fronte ao Espanyol, ao que salvaron os paus en dúas ocasións, en remates de Fede Cartabia e Florin Andone, e o seu porteiro Diego López, que detivo un penalti a Lucas mediada a segunda metade.

Clarence Seedorf, preparador deportivista, realizou tres cambios con respecto ao once inicial que presentou na pasada xornada ante o Alavés. Os obrigados de Raúl Albentosa, lesionado, e Zakaria Bakkali, sancionado por acumulación de amoestacións, e o de Michael Krohn-Dehli, por decisión técnica, que deixaron o seu sitio a Fabian Schär, Pedro Mosquera e Fede Cartabia, respectivamente.

O Dépor realizou o primeiro lanzamento do encontro. Foi por medio de Pedro Mosquera, que cazou a 5 metros da frontal da área un mal despexe da zaga catalá. O mediocentro non o pensou dúas veces. Aínda que potente, o seu disparo atrapouno un Diego López ben situado. Respondeu o Espanyol no minuto 7, por medio de Gerard Moreno, co mesmo resultado: Rubén atrapou o coiro con facilidade.

Despois dun longo tramo central do período inicial de maior control e máis chegadas á área rival, aínda que sen remates a porta, do Dépor, o Espanyol gozou dunha boa oportunidade. Corría o minuto 24 cando Víctor Sanchez centraba desde a banda dereita, pasado ao segundo pau, onde apareceu Léo Baptistão lanzándose ao chan en pos do balón. O remate forzado do brasileiro, completamente só, marchouse ás nubes.

O Dépor respondeu o minuto 28, pero topouse co poste. Lucas roubou un balón a Carlos Sánchez, abriu cara á dereita para Andone e o romanés cedeu cara atrás, ao bordo da área, para a chegada de Fede Cartabia. O arxentino controlou o esférico, levantou a vista e puxo un mísil teledirigido que se estrelou moi preto da cruceta dereita do portal de Diego López.

Catro minutos despois, Schär recuperou un balón ante Léo Baptistão, pero o rebote caeu a pés de Pedro Mosquera. O mediocentro buscou un balón longo para Andone, ás costas de David López. O romanés gañou a carreira e rematou coa súa bota esquerda xa desde dentro da área. O seu disparo marchouse cruzado á esquerda da portería visitante.

No minuto 37 contraatacou o Espanyol. Piatti roubou un balón a Juanfran en campo deportivista, avanzou e centrou cara á área, onde Léo Baptistão anticipouse a Bóveda. O brasileiro peiteou en exceso a súa cabezada, co que o esférico se perdeu pola liña de fondo.

A segunda metade arrancou con ambos os equipos máis tímidos que na primeira. Até o minuto 53 non se produciu unha acción con certo perigo. Foi un lanzamento lonxano de Carlos Sánchez que se foi moi por riba do traveseiro. O Dépor respondeu segundos máis tarde nun saque de esquina de Lucas que Andone cabeceou no primeiro pau, excesivamente alto.

Cando se cumpría o minuto 63, Lucas aguantaba o balón na área. O dianteiro interpúñase entre o balón e a arremetida de Granero, que o derrubou. O penalti lanzouno, xa no minuto 65, o propio Lucas, moi duro, por baixo, á dereita de Diego López. O gardameta visitante adiviñou a súa intención e repeleu o lanzamento.

Non desfaleceu o Dépor, que pouco despois contou con outra moi boa opción, nun balón cruzado desde o extremo esquerdo por Lucas que non despexou ben Aarón. Adrián quedou só na área, escorado á dereita, ante o propio Aarón e Diego López, pero precipitouse rematando ao primeiro toque, frouxo e excesivamente desviado.

No minuto 77 chegou o quinto remate á madeira nos tres últimos encontros. Un primoroso centro de Emre Çolak, que entrara por Fede Cartabia xusto despois do penalti errado, cabeceouno Andone ao traveseiro.

O Espanyol espertou no minuto 85, nun avance pola dereita de Marc Navarro. O substituto de Granero buscou un imposible, cun dereitazo lonxano a pé cambiado que, con todo, levantou o ¡uy! nas bancadas, pois saíu lamiendo o pau dereito do portal de Rubén.

O Dépor tentouno por todos os medios no tempo engadido, embotellando ao Espanyol, pero nin os tiros lonxanos de Juanfran e Emre Çolak, nin os balóns bombeados á área atoparon rematador, co que o encontro concluíu como comezou.

Un punto insuficiente para saír da zona vermella, con 18 en total, pero un partido que serviu para que á conclusión do encontro a bancada ofrecese un merecido e unánime aplauso ao seu equipo, que non se fixo acredor doutro resultado que non fose a vitoria.

RC Deportivo: Rubén, Juanfran, Schär, Bóveda, Luisinho, Guilherme, Pedro Mosquera (Muntari, min. 82), Lucas, Adrián, Fede Cartabia (Emre Çolak, min. 65) e Andone (Borja Valle, min. 89).

RCD Espanyol: Diego López, Víctor Sánchez, David López, Óscar Duarte, Aarón, Darder, Carlos Sánchez, Granero (Marc Navarro, min. 80), Léo Baptistão (Sergio García, min. 69), Gerard Moreno e Piatti (Jurado, min. 74).

Árbitro: Fernández Borbalán (c. andaluz). Cartón amarelo a Andone (min. 17), Pedro Mosquera (min. 33), Víctor Sánchez (min. 42), Schär (min. 60), Fede Cartabia (min. 62) e Bóveda (min. 83).

Incidencias: partido da 25ª xornada de LaLiga disputado no Estadio ABANCA-RIAZOR ante 18.139 espectadores.

RCD / J25 LaLiga Santander

  • Rubén
  • Luisinho
  • Juanfran
  • Fabian Schär
  • Eneko Bóveda
  • Pedro Mosquera (82')
  • Fede Cartabia (65')
  • Adrián
  • Lucas Pérez
  • Guilherme
  • Andone (89')

Suplentes

  • Fernando Navarro
  • Celso Borges
  • Sulley Muntari (82')
  • Borja Valle (89')
  • Emre Çolak (65')
  • Tytoń
  • Sidnei
  • Diego López
  • Víctor S.
  • O. Duarte
  • Aarón Martín
  • David López
  • S. Darder
  • Piatti (74')
  • Granero (80')
  • Carlos Sánchez
  • Gerard
  • Léo Baptistão (69')

Suplentes

  • M. Navarro (80')
  • Dídac Vilà
  • S. García (69')
  • Jurado (74')
  • Pau López
  • Naldo
  • Hermoso

Estadio

Estadio ABANCA-RIAZOR (18.148 espectadores)

Goles

    Árbitro

    David Fernández Borbalán amoestou aAndone (17'), Pedro Mosquera (33'), Fabian Schär (60'), Fede Cartabia (62'), Eneko Bóveda (83') do RC Deportivo y Víctor S. (42') do RCD Espanyol.

    RCD / Vídeo

    RCD / Vídeo

    RCD / Vídeo

    Valora a #osnosos no #DéporEspanyol

    #ANOSAFORZA
    7,4
    SCHÄR
    6,4
    MOSQUERA
    6,4
    EQUIPO TÉCNICO
    6,0
    ÇOLAK
    5,9
    ANDONE
    5,7
    BÓVEDA
    5,7
    FEDE CARTABIA
    5,7
    LUISINHO
    5,7
    ADRIÁN
    5,3
    MUNTARI
    5,3
    LUCAS
    5,2
    GUILHERME
    5,1
    BORJA VALLE
    4,9
    EQUIPO ARBITRAL
    4,9
    JUANFRAN
    4,8
    RUBÉN
    4,8
    O periodo de votación finalizou o 27-02-2018 21:49.